Azərbaycanda kənd adları dəyişir – səbəb nədir?
Azərbaycanda tarixi yer adlarının bərpası və milli toponimlərin qorunması istiqamətində aparılan işlər davam edir.
Bu çərçivədə Milli Məclis yanında fəaliyyət göstərən Toponimiya Komissiyası Quba rayonunda yerləşən üç kəndin adının dəyişdirilməsini məqsədəmüvafiq hesab edib.
Məsələ komissiyanın son iclasında müzakirə olunub və bildirilib ki, ölkə ərazisində müxtəlif dövrlərdə süni şəkildə dəyişdirilmiş və ya saxtalaşdırılmış bir sıra yer adlarının bərpası istiqamətində ardıcıl addımlar atılır.
Qeyd olunur ki, bu dəyişikliklər tarixi və milli toponimlərin qorunmasına, eyni zamanda dövlətçilik maraqlarına uyğun adların bərpasına xidmət edir. Bəs yer adlarının dəyişdirilməsi və tarixi toponimlərin bərpası nə dərəcədə vacibdir və bu proses ölkənin tarixi yaddaşının qorunmasına necə təsir göstərir?
Mövzu ilə bağlı professor Firudin Cəlilov Crossmedia.az-a açıqlama verib:
"Milli Məclisdə Toponomiya komissiyası var. Orada dilçilərin də köməkliyi ilə bu kimi adları səliqə səhmana salmalıdırlar. Sonradan qoyulan qondarma adları öz köhnə adları ilə əvəz etməlidirlər. Qulağa xoş gəlsin deyə dəyişməli deyillər. Demək olar ki, Azərbaycanın hər yerində toponim problemi var. Qondarma adlardır, onları dəyişmək, əski adlarını bərpa etmək lazımdır. Çünki toponimlər ölkənin tarixidir".
Ayhan
11:56 13.03.2026
Oxunuş sayı: 5050
