Kadr hazırlığının səviyyəsi ehtiyacları ödəmir: Əlavə 1500 həkimə ehtiyac var
Azərbaycanın səhiyyə sistemində aparılan mərhələli islahatlar sektorun idarəetmə modelinin yenilənməsi, xidmət keyfiyyətinin artırılması və əhalinin tibbi xidmətlərə əlçatanlığının genişləndirilməsi baxımından yeni mərhələyə qədəm qoyduğunu göstərir. Səhiyyə naziri Teymur Musayevin fevralın 26- da Ana Harayı abidəsinin önündə jurnalistlərə açıqlamasında səsləndirdiyi fikirlər isə bu prosesin yalnız infrastruktur və maliyyələşmə ilə məhdudlaşmadığını, eyni zamanda insan resursları siyasətinin də köklü şəkildə yenidən qurulmasının vacibliyini ön plana çıxarır.
Son illər icbari tibbi sığorta sisteminin tətbiqi, xəstəxanaların optimallaşdırılması və rəqəmsallaşma istiqamətində atılan addımlar islahatların əsas istiqamətləri kimi qiymətləndirilir. Bununla yanaşı, kadr siyasətində şəffaf seçim mexanizmləri, davamlı tibbi təhsil, regionlarda həkim çatışmazlığının aradan qaldırılması və peşəkarlıq meyarlarının sərtləşdirilməsi kimi məsələlər də aktuallığını qoruyur. Bu kontekstdə səhiyyədə aparılan dəyişikliklərin real nəticələri və kadr islahatlarının hansı istiqamətdə dərinləşdiriləcəyi mühüm müzakirə mövzusuna çevrilib.
Mövzu ilə bağlı Milli Məclisin deputatı Pərvanə Vəliyeva Crossmedia.az-a açıqlama verib: "Kadrların yerli ehtiyaclara uyğun paylanmaması, bir çox sahələrdə peşəkar kadr hazırlığının uzun müddətli əsasda planlaşdırılmaması, tibb mütəxəssislərinin müasir bilik və klinik təcrübədən yararlanmaq imkanlarının məhdudluğu əhalinin zəruri tibbi xidmətlərə bərabər əlçatanlığına və mövcud kadr resurslarının iş yükünün optimal paylanmasına mənfi təsir göstərir. Bir çox hallarda, tibb kadrları məzun olduqdan sonra Bakıda işləməyə üstünlük verirlər, bu isə regionların tələbatının ödənilməməsinə səbəb olur. Stimullaşdırıcı tədbirləri (sosial və ya maliyyə tədbirləri) həyata keçirməklə ilkin tibbi-sanitariya yardımda kadrların əhalinin ehtiyaclarına uyğun, xüsusilə regionlarda paylanmasının təmin edilməsi olduqca vacibdir".
Deputat qeyd edib ki, ailə həkimlərinin sayı normativ tələblərdən aşağıdır və regionlar üzrə qeyri-bərabər paylanıb: "Kadr hazırlığının səviyyəsi sahədəki ehtiyacları ödəmir. Təxminən 1500 əlavə ailə həkimə ehtiyac var. Bunun üçün ATU-nun ailə həkimliyi rezidentura proqramının və Tibb Kolleclərinin təlim proqramlarının təkmilləşdirilməsi və ilkin tibbi-sanitariya yardımın ehtiyaclarına uyğunlaşdırılması məqsədəuyğun olardı. Tibb mütəxəssislərinin sertifikasiya qaydalarında ailə həkimlərinə tutduqları vəzifələrə uyğun sertifikasiyasının təşkil edilməsi də bu sahədə kadr ehtiyacının ödənilməsinə töhfə verər. Bütün bunlar, ilkin tibbi-sanitariya yardımının təkmilləşdirilməsi üzrə hazırda həyata keçirilən konsepsiyanın hədəfləridir və bu istiqamətdə hazırda işlər görülür. Sertifikasiya zamanı ixtisas dəyişdirmənin mümkünlüyünün qanunla ləğv edilməsi ilə artıq ixtisas dəyişmək istəyən şəxslər yenidən rezidentura təhsili almalı olacaqlar. Bu isə, bir sıra çatışmayan ixtisaslar üzrə uzunmüddətli əsasda kadr çatışmazlığını yarada bilər. Düşünürəm ki, ailə həkimliyi kimi çatışmayan ixtisas sahələri üzrə bu qanunda istisnalar edilə bilər".
Ayhan
16:07 27.02.2026
Oxunuş sayı: 823
