82 illik həsrətin göz yaşı
Bu gün qəddar Sovet imperiyasının çeçen və inquş xalqlarını doğma torpaqlarından zorla sürgün etməsinin 82-ci ildönümüdür.
Crossmedia.az bu barədə xarici mediaya istinadən məlumat verir.
23 fevral – 9 mart 1944-cü il tarixlərində SSRİ rəhbərliyinin qərarı ilə çeçenlər və inquşlar kütləvi şəkildə deportasiya edildi. Əməliyyat İosif Stalin dövründə həyata keçirilmişdi və bütün bir xalqa qarşı kollektiv ittiham prinsipi tətbiq olunmuşdu. Rəsmi səbəb kimi nasistlərlə əməkdaşlıq iddiaları göstərilsə də, insanlar mənsubiyyətlərinə görə – məhkəməsiz, sübutsuz və müdafiə hüququ olmadan – “təqsirli” elan olunmuşdular.
Qısa müddət ərzində təxminən 500–650 min nəfər öz yurd-yuvasından zorla çıxarılaraq əsasən Mərkəzi Asiyaya göndərildi. Əmlakları müsadirə olundu, evləri və təsərrüfatları əllərindən alındı. İnsanlar yük qatarlarının soyuq vaqonlarında daşınır, yolboyu soyuq, aclıq və xəstəlik səbəbindən minlərlə insan həyatını itirirdi.
Müxtəlif mənbələrə görə, sürgün və sonrakı ilk illərdə on minlərlə çeçen və inquş həlak olub. Bu hadisə hər iki xalq üçün ciddi demoqrafik və sosial fəsadlar doğurdu.
Tarixi faktlar göstərir ki, xalqların hüquqlarının pozulması və kollektiv cəzalandırma siyasəti uzunmüddətli sabitlik gətirmir. Keçmiş hadisələrin obyektiv qiymətləndirilməsi və onların nəticələrinin dərk olunması cəmiyyətlərin sağlam inkişafı üçün mühüm əhəmiyyət daşıyır.
Turqut Ansari
16:10 23.02.2026
Oxunuş sayı: 788
