Tanış olduğu qızı şantaj edən tələbə ilə bağlı QƏRAR VERİLDİ
Ali Məhkəmədə hədə-qorxu ilə tələb etmədə təqsirləndirilən T.Məmmədlinin barəsindəki qərardan verilən kassasiya şikayəti üzrə məhkəmə iclası başa çatıb.
Crossmedia.az pravda.az-a istinadən xəbər verir ki, hakim Teyyub Muxtarovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti və əlavə qismən təmin edilib, Bakı Apellyasiya Məhkəməsinin qərarı kassasiya şikayətinə münasibətdə dəyişdirilib. Onun təqsirli bilindiyi Cinayət Məcəlləsinin (CM) 182.2.2-ci maddəsi ilə təyin edilmiş 5 il müddətinə azadlıqdan məhrumetmə cəzası, CM-in 70-ci maddəsinə əsasən 2 il müddətə sınaq müddəti müəyyən edilməklə şərti olaraq tətbiq olunub. T.Məmmədli cəza çəkdiyi cəzaçəkmə müəssisəsindən dərhal azad edilib.
İttihama görə, T.Məmmədli zərərçəkmiş S.S.-in (adı, soyadı şərtidir) barəsində rüsvayedici məlumatların yayılması ilə hədələyərək onun əmlakını hədə-qorxu yolu ilə təkrarən tələb etməkdə təqsirli bilinib.
İş materiallarında qeyd edilir ki, o, tamah niyyəti ilə özgənin əmlakını qanunsuz olaraq ələ keçirmək məqsədilə 2025-ci ilin yanvar ayının sonlarında tanış olduğu zərərçəkmiş şəxsə özünü hüquq-mühafizə orqanının əməkdaşı kimi təqdim edib. Həmin qızı sosial şəbəkələrdə T.T. (adı, soyadı şərtidir) narahat edib. S.S. də bu barədə T.Məmədliyə bildirib. Təqsirləndirilən şəxs isə zərərçəkmişi “qorumaq” adı altında onunla nişanlı olmaları görüntüsünü yaratmağı təklif edib. Bu məqsədlə birlikdə səmimi fotoşəkil çəkdirərək həmin görüntünü mobil telefon vasitəsilə ələ keçirib.
Daha sonra – 10 fevral 2025-ci il tarixdə T.Məmədli həmin fotogörüntünü internet üzərindən yayıb ictimailəşdirəcəyi, eləcə də zərərçəkmiş şəxsin ailə üzvlərinə göstərəcəyi ilə hədələyərək onu rüsvay edəcəyi barədə hədə-qorxu gəlib. Rüsvayedici məlumatların yayılmaması qarşılığında S.S.-dən 1000 manat pul tələb edilib və görüş yeri kimi Bakı şəhəri, Yasamal rayonu, Zahid Xəlilov küçəsində yerləşən yaşayış binasının həyəti göstərilib. 11 fevral 2025-ci il tarixdə saat 15:44-də zərərçəkmiş şəxs “eManat” ödəmə terminalı vasitəsilə 300 manat məbləğində pul vəsaitini onun bank kartına köçürüb. Bununla da T.Məmədli hədə-qorxu yolu ilə 300 manat pulu ələ keçirərək zərərçəkmiş şəxsə maddi ziyan vurub.
Bununla kifayətlənməyən T.Məmədli eyni niyyətlə təkrarən hədə-qorxu ilə tələb etmə cinayətini törədib. Belə ki, 7 aprel 2025-ci il tarixdə “WhatsApp” vasitəsilə S.S. ilə əlaqə saxlayaraq həmin fotogörüntünü internet üzərindən yayıb ictimailəşdirəcəyi və ailə üzvlərinə göstərəcəyi ilə hədələyib. Bu dəfə də rüsvayedici məlumatların yayılmaması müqabilində zərərçəkmiş şəxsdən 500 manat pul tələb edib. Həmin gün zərərçəkmiş şəxs banklardan birinin mobil tətbiqi vasitəsilə 500 manat məbləğində pul vəsaitini təqsirləndirilən şəxsin istifadəsində olan eyni bank kartına köçürüb. Nəticədə T.Məmədli hədə-qorxu yolu ilə əlavə 500 manat pulu ələ keçirərək zərərçəkmiş şəxsə ümumilikdə 800 manat maddi ziyan vurub.
Bakı Ağır Cinayətlər Məhkəməsinin hökmü ilə T.Məmədli barəsində şərti cəza təyin edilib. Lakin Bakı Apellyasiya Məhkəməsinin qərarı ilə dövlət ittihamçısının verdiyi apellyasiya protesti təmin olunub, onun apellyasiya şikayəti isə təmin edilməyib. Apellyasiya instansiyası tərəfindən hökm dəyişdirilərək T.Məmədli barəsində CM-in 70-ci (şərti məhkumetmə) maddəsinin tətbiqinə dair göstərişlər hökmdən çıxarılıb və ona 4 il 7 ay müddətinə azadlıqdan məhrum etmə cəzası təyin edilib.
Qeyd: T.Məmədli həbs edilən zaman Bakıdakı universitetlərin birində birinci kursda əyani şöbədə təhsil alırmış.
11:04 09.02.2026
Oxunuş sayı: 436
