Hansı bal hansı xəstəliyə faydalıdır – Pətək balı, yoxsa süzmə bal?
Bal təkcə qida deyil, həm də təbii şəfa mənbəyidir. .Şam, şabalıd, kəklikotu və digər bal növləri müxtəlif xəstəliklərə qarşı fərqli təsirlərə malikdir. Türkiyənin zəngin bitki örtüyü bal növlərinin müxtəlifliyini artırır. Ölkənin hər bölgəsində istehsal olunan bal dadı, rəngi və sağlamlığa təsiri ilə seçilir. Arıların topladığı nektarın mənbəyi balın tərkibini və müalicəvi xüsusiyyətlərini müəyyənləşdirir.
Bu barədə Düzcə Universitetinin Arıçılıq Araşdırma, İnkişaf və Tətbiq Mərkəzinin direktoru, professor Meral Kekeçoğlu CNN Türk-ə açıqlama verib.
Bal növləri necə ayrılır?
Mütəxəssisin sözlərinə görə, bal növləri monofloral və polifloral olmaqla iki qrupa bölünür. Monofloral bal arıların əsasən bir bitkidən nektar toplaması nəticəsində əldə edilir. Məsələn, tərkibində yüksək faizdə şabalıd poleni olan bal şabalıd balı adlanır.
Bir neçə çiçəkdən toplanan nektardan hazırlanan ballar isə “çiçək balı” və ya “yayla balı” kimi tanınır.
Hansı bal nəyə xeyirlidir?
Professor Kekeçoğlunun açıqlamasına görə:
Şabalıd balı – güclü antioksidantdır, ürək-damar sistemini dəstəkləyir, xərçəngə qarşı qoruyucu təsir göstərir;
Şam balı – immuniteti gücləndirir, öskürək zamanı bəlğəmgətirici təsirə malikdir, mədə problemlərinə faydalıdır;
Kəklikotu balı – ağız boşluğu infeksiyalarının müalicəsində istifadə olunur;
Palıd balı – qan azlığının qarşısını almağa kömək edir.
Qeyd edək ki , mütəxəssis “dəli bal” kimi tanınan rododendron balının düzgün istifadə edilmədikdə ciddi sağlamlıq riskləri yaratdığını da vurğulayıb.
Şəkər xəstələri bal yeyə bilərmi?
Məlumata görə, bəzi bal növlərinin qlisemik indeksi aşağıdır. Şam, şabalıd, akasiya və cökə balları qan şəkərini daha yavaş yüksəldir. Lakin bu halda balın təbii və xam olmasına xüsusi diqqət yetirilməlidir.
Pətək balı, yoxsa süzmə bal daha təhlükəsizdir?
Professor bildirib ki, müasir qablarda istehsal olunan hazır pətəklərdə bəzi hallarda qalıq riski yarana bilər. Bu səbəbdən süzmə bal daha təhlükəsiz hesab olunur.
Bununla yanaşı, arının özünün hördüyü pətəkdən əldə edilən bal tapılarsa, onun qaraciyər xəstəliklərinə qarşı müsbət təsiri olduğu qeyd edilir.
Fatimə Məmmədova
09:50 05.01.2026
Oxunuş sayı: 2261
