Ukrayna ilə bağlı qətnamə qəbul edildi
Avropa Parlamenti 27 noyabrda Ukrayna ilə bağlı qətnamə qəbul edərək Avropa İttifaqını sülh prosesində daha fəal rol almağa və Avropanın təhlükəsizliyi üçün daha böyük məsuliyyət götürməyə çağırıb.
Crossmedia.az bu barədə xarici mediaya istinadən xəbər verir.
Məlumata görə, sənəd 401 lehinə, 70 əleyhinə və 90 bitərəf səslə təsdiqlənib.
Qətnamədə vurğulanır ki, davamlı sülh yalnız atəşkəs əldə olunduqdan sonra və Ukraynaya Aİ və ABŞ tərəfindən NATO səviyyəsinə yaxın etibarlı təhlükəsizlik zəmanətləri verildiyi halda mümkündür. Avropa Parlamenti qeyd edib ki, Rusiya tərəfindən işğal olunan ərazilər heç bir halda tanınmamalıdır və sülh danışıqları mütləq Kiyev və Brüsselin iştirakı ilə aparılmalıdır.
Sənəddə bildirilib ki, hazırlanan razılaşma Ukraynanın suverenliyini və ərazi bütövlüyünü qorumaq imkanlarını məhdudlaşdırmamalı, eləcə də ölkənin siyasi və müdafiə ittifaqlarını Rusiya vetosundan kənar seçmək hüququna mane olmamalıdır.
Qətnamənin ayrıca hissəsində Rusiyanın məsuliyyəti və dondurulmuş aktivlərin istifadəsi məsələləri yer alır. Avropa Parlamenti qeyd edir ki, sülh razılaşması Ukraynaya dəymiş ziyanın tam şəkildə kompensasiya olunmasını nəzərdə tutmalıdır. Deputatlar Aİ-ni və üzv ölkələri dondurulmuş Rusiya aktivləri hesabına "reparasiya krediti" mexanizminin təcili tətbiqinə çağırıblar.
Sənəddə həmçinin Rusiyaya qarşı sanksiyaların sülh razılaşması tam icra olunana qədər qüvvədə saxlanmasının vacibliyi vurğulanıb.
Nigar Yahyazadə
17:40 27.11.2025
Oxunuş sayı: 1280
