Xarici xəbərlər

İranın BMT-dəki səfiri ABŞ-ı ittiham etdi

İranın BMT-dəki daimi nümayəndəsi Əmir Səid İravani BMT Baş katibinə və Təhlükəsizlik Şurasının sədrinə məktub göndərərək ABŞ-ı İsrailin İrana qarşı həyata keçirdiyi “aqressiyada” əsas və operativ rol oynamaqda ittiham edib.

Crossmedia.az bu barədə IRNA-ya istinadən xəbər verir. Məktubda qeyd edilir ki, Tehran “məsul şəxslərin cəzalandırılması və dəymiş ziyanın tam ödənilməsi üçün bütün qanuni mexanizmlərdən istifadə etmək hüququnu” özündə saxlayır.

İravani bildirib ki, İsrailin ABŞ-la koordinasiya şəklində atdığı addımlar İranın suverenliyini və ərazi bütövlüyünü pozur, həmçinin BMT Nizamnaməsinin 2(4)-cü maddəsinə ziddir. Səfirin sözlərinə görə, ABŞ “İrana vurulan maddi və mənəvi zərərlərə görə kompensasiya ödəməyə borcludur”.

Diplomat məktubda qeyd edib ki, ABŞ-ın prosesdə iştirakının etirafı, beynəlxalq humanitar hüququn ciddi şəkildə pozulmasında iştirak edən Amerika rəsmilərinin “fərdi cinayət məsuliyyəti”ni gündəmə gətirir.

İran tərəfi vurğulayıb ki, ölkə günahkarların məsuliyyətə cəlb olunması və ziyanın ödənilməsi üçün bütün mövcud hüquqi mexanizmləri işə salmağa qərarlıdır.

Sevinc Yarməmmədova

🖨 Çap et

16:30 27.11.2025

Oxunuş sayı: 1074