Hindistan S-400 və Su-30MKI silahlarını modernizasiya edir
Hindistan Müdafiə Nazirliyi Rusiya istehsalı olan S-400 zenit-raket kompleksləri üçün iri partiya raketlərin alınmasını təsdiqləyib.
Crossmedia.az xəbər verir ki, bu barədə məlumatı “The Times of India” nəşri yayıb.
Mənbələrin məlumatına görə, raketlər müxtəlif məsafələr üçün nəzərdə tutulub və may ayında Hindistan-Pakistan hərbi qarşıdurması zamanı istifadə olunmuş silahların ehtiyatlarını artırmaq və rezerv yaratmaq məqsədi daşıyır.
Eyni zamanda, Hindistan Rusiya ilə bir illik S-400 komplekslərinin texniki xidmət müqaviləsini imzalayıb. Müqavilə çərçivəsində Rusiya Hindistanda texniki xidmət və təmir mərkəzi yaradacaq.
Baş nazir Narendra Modi rəhbərliyindəki hökumətin təhlükəsizlik komitəsi isə ilk 84 ədəd Su-30MKI döyüş təyyarəsinin modernizasiyasını təsdiqləmək niyyətindədir. Modernizasiya çərçivəsində təyyarələr müasir avionika, radar və uzunmənzilli silahlarla təchiz olunacaq. Hazırda Hindistan Hərbi Hava Qüvvələrində 259 ədəd Su-30MKI xidmətdədir.
Mənbələr qeyd ediblər ki, modernizasiya əsasən yerli qüvvələr tərəfindən həyata keçiriləcək, lakin Rusiyanın bu prosesdə müəyyən rolu olacaq.
12:15 27.11.2025
Oxunuş sayı: 1051
