Baydenin "Müttəfiqləri qarşılama" proqramı qalmaqalın mərkəzində
Vaşinqtonun mərkəzində Ağ Evə yaxın ərazidə baş verən silahlı insident nəticəsində iki ABŞ Milli Qvardiya hərbçisi ağır yaralanıb
Vaşinqtonun mərkəzində baş verən atışmada ABŞ Milli Qvardiyasının iki hərbçisi ağır yaralanıb. Hadisənin əsas şübhəlisi — 29 yaşlı Əfqanıstan vətəndaşı Rəhmanulla Lakanvalın əvvəllər Əfqanıstanda Amerika hərbi birlikləri ilə xidmət etdiyi bildirilir.
Crossmedia.az The New York Times-a istinadən xəbər verir ki, “həmin şəxs ABŞ-a prezident Co Bayden administrasiyasının “Müttəfiqləri qarşılama” proqramı çərçivəsində gəlib. Bu proqram ABŞ qoşunlarının Əfqanıstandan çıxarılmasından və “Taliban”ın hakimiyyətə qayıtmasından sonra əfqan vətəndaşlarının ölkəyə girişinə imkan yaradırdı”.
Hadisədən sonra ABŞ Vətəndaşlıq və İmmiqrasiya Xidməti əfqan vətəndaşlarının ölkəyə giriş üçün müraciətlərinin dərhal dayandırıldığını elan edib. Atışma Ağ Evin bir kvartal aralığında baş verib. Hücum edən şəxs iki Milli Qvardiya əməkdaşına atəş açıb. Onların hər ikisi xəstəxanaya yerləşdirilib və vəziyyətlərinin kritik olduğu bildirilir.
ABŞ Prezidenti Donald Tramp hadisəni “zorakılıq, nifrət və terror aktı” adlandıraraq, şübhəlinin “bunun əvəzini ağır ödəyəcəyini” bildirib. Hadisədən sonra müdafiə naziri Pit Hegset əlavə olaraq 500 Milli Qvardiya hərbçisinin Vaşinqtona göndəriləcəyini açıqlayıb
Zeynəb Xuduyeva
11:50 27.11.2025
Oxunuş sayı: 998
