Brüsseldəki Azərbaycan Evində dərslər başlayıb
Belçika Krallığının paytaxtı Brüssel şəhərində fəaliyyət göstərən Azərbaycan Evində Azərbaycan dili, şahmat və rəqs dərslərinin keçirilməsinə başlanılıb.
Crossmedia.az xəbər verir ki, tədris proqramı çərçivəsində Azərbaycan dili dərsləri ayda iki dəfə olmaqla iki qrup üzrə təşkil olunur. Şahmat və rəqs dərsləri isə ayda dörd dəfə, əsasən həftə sonları keçirilir.
8 yaşadək uşaqlar və böyüklər üçün ayrıca tədris qrupları formalaşdırılıb. Bununla da Brüsseldə yaşayan müxtəlif yaş kateqoriyalarına aid soydaşlarımıza aid öyrənmə imkanı yaradılıb.
Layihənin məqsədi Belçikadakı Azərbaycan icması arasında milli-mədəni dəyərlərin qorunması, uşaq, yeniyetmə və gənclərin intellektual və yaradıcılıq bacarıqlarının inkişaf etdirilməsi, eləcə də Azərbaycan dilinin tədrisinin sistemli şəkildə təşkili üçün davamlı platforma yaratmaqdır.
Qeyd edək ki, şahmat və rəqs dərsləri “FireLand” Azərbaycanlılar Birliyinin təşkilatçılığı ilə gerçəkləşdirilir.
00:39 25.11.2025
Oxunuş sayı: 7265
