Seulda Azərbaycan icmasının üzvləri və azərbaycanlı tələbələrlə görüş keçirilib
“Konstitusiya və Suverenlik İli” çərçivəsində Şanlı Zəfərimizin 5 illiyi münasibətilə Koreya Respublikasının paytaxtı Seul şəhərində icmamızın üzvləri və azərbaycanlı tələbələrlə görüş keçirilib.
Crossmedia.az xəbər verir ki, Diasporla İş üzrə Dövlət Komitəsinin dəstəyi ilə baş tutan görüşün əvvəlində Azərbaycan Respublikasının Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad olunub.
Azərbaycan Diasporuna Dəstək Fondunun icraçı direktoru Əkrəm Abdullayev iştirakçıları salamlayaraq Qarabağ Zəfərinin 5 illiyi münasibətilə soydaşlarımızı təbrik edib. O, fondun fəaliyyət istiqamətləri, həyata keçirdiyi layihələr barədə geniş məlumat verib. Diaspor hərəkatının gücləndirilməsi, xaricdə yaşayan soydaşlarımızın birliyinin möhkəmləndirilməsi, milli kimliyin qorunması və mədəni diplomatiyanın genişləndirilməsi sahəsində görülən işləri diqqətə çatdırıb. Həmçinin fondun təhsil təşəbbüsləri, gənclərin fəaliyyətinin dəstəklənməsi, informasiya təminatı, Azərbaycan həqiqətlərinin beynəlxalq aləmdə təbliği, müxtəlif ölkələrdə icmaların layihələrinin maliyyələşdirilməsi və yeni əməkdaşlıq platformalarının yaradılmasından bəhs edib. Vurğulayıb ki, Koreyada yaşayan azərbaycanlıların təşkilatlanması dövlətimizin daim diqqət mərkəzindədir.
Tədbirdə çıxış edən Azərbaycan Respublikasının Koreya Respublikasındakı Səfirliyinin əməkdaşı Vüsalə Zeynallı Azərbaycan diplomatiyasında diaspor fəaliyyətinin təşviqinə xüsusi diqqət yetirildiyini bildirib.
Görüş zamanı tələbələrin təhsil mühiti, akademik fəaliyyəti və onları düşündürən digər məsələlər müzakirə olunub. İştirakçıların fondun dəstək mexanizmləri, qrant proqramları, mədəni və sosial layihələrdə iştirak imkanları haqqında sualları cavablandırılıb.
Qeyd edək ki, tədbirin təşkilində Azərbaycan icmasının fəal üzvləri - fəlsəfə doktoru Leyla Məsimli və Əzizə Hüseynzadənin də xüsusi rolu olub.
18:23 24.11.2025
Oxunuş sayı: 6017
