Norveçdə Azərbaycan və Türkiyənin bayramları birgə qeyd edilib
Norveçin Bergen şəhərində Azərbaycan Respublikasının Diasporla İş üzrə Dövlət Komitəsinin dəstəyi, Azərbaycan-Türk Forumu İctimai Birliyinin (ATFIV) və Norveç Azərbaycan Gənclər Təşkilatının (NAYO) birgə əməkdaşlığı ilə 8 Noyabr - Zəfər Gününə və Türkiyə Respublikasının 102 illiyinə həsr olunan mədəni tədbir keçirilib.
Bergenin Vannkanten Mədəniyyət Zalında baş tutan tədbirdə Azərbaycanın Türkiyənin Dövlət himnləri səsləndirilib, Vətənin azadlığı və suverenliyi uğrunda canlarını fəda edən qəhrəmanların əziz xatirəsi ehtiramla anılıb. Daha sonra Zəfər Gününə həsr olunan videoçarx nümayiş etdirilib.
Crossmedia.az xəbər verir ki, qonaqları səmimi salamlayan ATFIV rəhbəri Ələkbər İsmayılov Zəfəri milli birliyimizin, gücümüzün və həmrəyliyimizin göstəricisi kimi dəyərləndirib. Bu cür tədbirlərin Vətəndən uzaqda böyüyən gənclərimiz arasında milli kimliyin formalaşmasındakı vacib rolunu diqqətə çatdırıb.
ATFIV-nin sədr müavini Serdar Sezgun çıxışında “Qərib ölkədə yaşasaq da, azərbaycanlılar və türklər burada qardaş kimi bir-birinə dayaqdır. “İki dövlət, bir millət” anlayışı belə tədbirlərdə öz real ifadəsini tapır,” – deyə vurğulayıb.
Tədbir mədəni hissə ilə davam edib. Əməkdar artistlər Elçin Abbasov (tar) və Toğrul Əsədullayev (kamança), Azərbaycan Dövlət Akademik Opera və Balet Teatrının solisti Orxan Cəlilov (vokal), “7-ci TV” muğam müsabiqəsinin laureatı Rəvan Qaçayev (muğam), eləcə də rəqqas Firuz Əliyev və rəqqasə Cəmilə Listkovanın bir-birindən gözəl ifaları zalda böyük coşqu yaradıb.
Tədbir iştirakçıların birgə “Qarabağ Azərbaycandır!” şüarı ilə yekunlaşıb.
Qeyd edək ki, belə tədbirlər Azərbaycan tarixinin və mədəniyyətinin beynəlxalq səviyyədə tanıdılması, ölkəmizin haqq səsinin dünya ictimaiyyətinə çatdırılması baxımından xüsusi önəm daşıyır.
02:35 19.11.2025
Oxunuş sayı: 1155
