Azərbaycanlı siyasətçi: Ermənistan Zəngəzur dəhlizi istiqamətində hər hansı təxribat törədərsə...
Azərbaycan regionun nəqliyyat xəritəsində mühüm strateji mövqeyə malik olan Araz dəhlizinin tikintisini sürətlə davam etdirir. Bu dəhlizin əsas hissəsini təşkil edən Ağbənd–Kəlalə avtomobil körpüsü ilin sonuna kimi istifadəyə veriləcək. Yeni körpü Azərbaycan, İran və Rusiya arasında nəqliyyat əlaqələrinin genişlənməsində və beynəlxalq tranzit marşrutlarının formalaşmasında mühüm rol oynayacaq. Bunu Bakıda keçirilən Azərbaycan, Rusiya və İran hökumət nümayəndələrinin üçtərəfli görüşü zamanı Baş nazirin müavini Şahin Mustafayev bəyan edib.
Şahin Mustafayev bildirib ki, 2022-ci ilin mart ayında Azərbaycan və İran arasında imzalanmış Hökumətlərarası Anlaşma Memorandumuna əsasən, Araz çayı üzərində inşası davam edən Ağbənd–Kəlalə körpüsü regionun strateji nəqliyyat infrastrukturunun ayrılmaz hissəsinə çevriləcək:
“Araz dəhlizinin vacib komponenti olan körpünün tikintisinin bu ilin sonuna kimi yekunlaşdırılması, sərhəd-gömrük infrastrukturunun isə gələn ilin birinci rübündə istifadəyə verilməsi nəzərdə tutulub,” – deyə Baş nazirin müavini vurğulayıb.
Araz dəhlizi təkcə Azərbaycan üçün deyil, bütövlükdə region üçün strateji əhəmiyyət daşıyır. Yeni nəqliyyat xətti Fars körfəzini Qara dənizlə birləşdirəcək, bununla da Yaxın Şərqdən Avropaya qədər uzanan geniş logistika zəncirinin əsas halqasına çevriləcək.
Mövzu ilə bağlı Crossmedia.az-a açıqlama verən “Azad Vətən partiyası”nın sədri Akif Nağı bildirib ki, Araz körpüsünün istifadəyə verilməsi bir neçə cəhətdən həm Azərbaycan, həm də bütövlükdə region üçün böyük əhəmiyyət daşıyır: “Körpü İran ərazisindən keçsə də, bu yol Azərbaycan üçün strateji baxımdan milli əhəmiyyətə malikdir və faktiki olaraq ölkəmizin iqtisadi və siyasi maraqlarına xidmət edir. Həmin xətt Orta Dəhlizin davamıdır. Bildiyiniz kimi, Orta Dəhliz iki əsas istiqamətə ayrılır: biri Zəngəzur dəhlizi, digəri isə Araz dəhlizidir. Araz dəhlizi İran ərazisindən keçərək Türkiyəyə, oradan isə Avropaya qədər uzanır. Bu baxımdan həmin yol həm Azərbaycan, həm də region dövlətləri üçün olduqca strateji önəm daşıyır. Yeni körpü vasitəsilə yüklərin daşınma həcmi xeyli genişlənəcək. Azərbaycan, İran və Rusiya baş nazirlərinin müavinləri və nazirlər səviyyəsində keçirilən son görüşlərdə bu məsələ əsas müzakirə mövzularından biri olub. Azərbaycan tərəfdən Baş nazirin müavini Şahin Mustafayev görüşdə bildirib ki, körpü vasitəsilə illik 5 milyon ton yük daşınması mümkün olacaq. Bu, iqtisadi baxımdan çox böyük göstəricidir və regionun ticarət dövriyyəsinə ciddi təkan verəcək”.
A.Nağı həmçinin bildirib:
“Bu layihə təkcə Azərbaycan üçün deyil, İran, Türkiyə, Avropa, eləcə də Orta Dəhlizə qoşulan dövlətlər – Çin, Yaponiya, Qazaxıstan, Özbəkistan və digər Mərkəzi Asiya ölkələri üçün də mühüm əhəmiyyət kəsb edir. Məsələnin bir tərəfi iqtisadi mənfəət və daşımaların genişlənməsidirsə, digər tərəfi Azərbaycanın nəqliyyat şəbəkəsinin şaxələnməsi ilə bağlıdır. Zəngəzur dəhlizi fəaliyyətə başladıqdan sonra həm Zəngəzur, həm də Araz marşrutları üzrə yüklərin daşınması paralel şəkildə həyata keçiriləcək. Bu isə təhlükəsizlik və davamlılıq baxımından olduqca vacibdir. Məsələn, əgər Ermənistan Zəngəzur dəhlizi istiqamətində hər hansı təxribat törədərsə, Azərbaycan Araz dəhlizi vasitəsilə yüklərin daşınmasını davam etdirə biləcək. Eyni hal İran istiqamətində baş versə, Zəngəzur dəhlizi alternativ marşrut kimi çıxış edəcək. Bu da Azərbaycanın maraqlarına tam cavab verən, şaxələndirilmiş və təhlükəsiz logistika siyasətidir. Hər iki dəhlizin açılması Azərbaycanın regionda mövqeyini daha da gücləndirir. Bu, həm siyasi, həm də iqtisadi baxımdan ölkəmizin strateji əhəmiyyətini artırır və onu regional nəqliyyat qovşağının əsas mərkəzinə çevirir. Bəzən bəzi dairələr “Türk qovşağı” ifadəsini səsləndirirlər, amma reallıq ondan ibarətdir ki, bütün yolların kəsişdiyi, real qovşaq nöqtəsi məhz Azərbaycandır. Şimaldan cənuba, şərqdən qərbə gedən əsas marşrutlar ölkəmizdən keçir. Bu, tarixi ənənənin müasir dövrdə bərpasıdır. Böyük İpək Yolu eramızdan əvvəl II əsrdən başlayaraq XVI əsrə qədər dünyanın iqtisadi “şah damarı” olub və həmin dövrdə Azərbaycan bu yolun “Qızıl qapısı” adlandırılırdı. Qərbdən və şərqdən gələn mallar burada görüşür, Azərbaycanın böyük şəhərləri – Dərbənd, Bakı, Şamaxı, Bərdə, Tiflis – mühüm ticarət mərkəzləri rolunu oynayırdı. İndi isə tarix təkrar olunur: Azərbaycan yenidən regionun əsas tranzit və iqtisadi mərkəzinə çevrilir. O dövrlərdə olduğu kimi, bu gün də ölkəmiz böyük İpək Yolunun müasir forması olan Orta Dəhlizdə aparıcı rol oynayır və bu funksiyanı uğurla yerinə yetirir”.
Günel Verdiyeva
22:04 13.10.2025
Oxunuş sayı: 2022
