Yaxın Şərqlə bağlı erkən sevinc?: Tərəflər sağ göstərib sol vura bilər
Yaxın Şərqdə silahların səssizliyi pərdəarxası diplomatiyanın böyük sövdələşməsindən asılı vəziyyətə düşüb. İsrailin "Kan" teleradio şirkətinin yaydığı son məlumatlar regionda geosiyasi kartların yenidən paylandığını göstərir: Vaşinqton və Tehran arasında əldə olunan gizli razılaşma Cənubi Livandakı hərbi əməliyyatları tamamilə dayandıra bilər. Lakin tarixin ən mürəkkəb geosiyasi düyünlərindən biri olan ABŞ-İran gərginliyinin yalnız bir atəşkəs xəbəri ilə tamamilə tarixə qovuşacağını düşünmək real görünmür. Çünki regionda qalıcı sabitliyin qarşısında hələ də nüvə ambisiyalarından tutmuş, proksi qüvvələrin şəbəkəsinə qədər uzanan bütöv bir böhranlar zənciri dayanır.
Məsələ ilə bağlı siyasi şərhçi Vüsalə Gülmalıyeva Crossmedia.az-a açıqlama verib.
O, bildirib ki, belə bir ABŞ-İran gərginliyi tamamilə aradan qalxmayacaq.
"Belə bir ssenaridə ABŞ-İran gərginliyinin tamamilə bitəcəyini demək çətindir. Hazırda ABŞ və İran arasında müvəqqəti razılaşma və atəşkəsə dair xəbərlər yayılıb. Bunun Livandakı döyüşlərin azalmasına təsir göstərə biləcəyi bildirilir. Amma regionda sabitliyin tam təmin olunmasına mane olan bir neçə əsas məsələ hələ də qalmaqdadır. Bunları İranın nüvə proqramı, İranın regiondakı müttəfiq silahlı qruplarla münasibətləri, İsrailin təhlükəsizlik narahatlıqları, eləcə də Livan, Qəzza və Suriya ilə bağlı həll olunmamış problemlər kimi qruplaşdırmaq olar. Bundan əlavə, İsrail rəsmiləri Cənubi Livandan tam geri çəkilmək və ya bütün əməliyyatları dayandırmaq məsələsinə kifayət qədər ehtiyatla yanaşdıqlarını bildirirlər. Ona görə də əgər belə bir razılaşma baş tutsa, bu, regionda gərginliyi əhəmiyyətli dərəcədə azalda və qısamüddətli sabitlik yarada bilər. Lakin ABŞ–İran qarşıdurmasının və Yaxın Şərqdəki bütün təhlükəsizlik problemlərinin birdəfəlik həll olunacağını söyləmək üçün hələ çox tezdir".
Turqut Ansari
16:15 15.06.2026
Oxunuş sayı: 59
