Gündəm

Hikmət Hacıyevi Ermənistana aparan mühüm səbəb: İkinci dünya müharibəsindən sonra da belə olmuşdu

Ermənistanın Dilican şəhərində Azərbaycan Prezidentinin köməkçisi Hikmət Hacıyev ilə Ermənistanın Təhlükəsizlik Şurasının katibi Armen Qriqoryan arasında işgüzar görüş keçirilib.

Görüş zamanı tərəflər Azərbaycan-Ermənistan sülh gündəliyi ilə bağlı bir sıra məsələləri müzakirə ediblər. Regionda davamlı sülhün və sabitliyin təşviqinə yönəlmiş səylər çərçivəsində ikitərəfli dialoqun davam etdirilməsinin əhəmiyyəti vurğulanıb.

Tərəflər, həmçinin iki ölkənin vətəndaş cəmiyyətləri arasında etimad quruculuğu tədbirləri barədə fikir mübadiləsi aparıblar.

Hikmət Hacıyev və Armen Qriqoryan işçi səviyyəsində təmasların davam etdirilməsi barədə qərar qəbul edib, növbəti görüşün Azərbaycanda keçiriləcəyini təsdiqləyiblər.

Bu səfərin Ermənistandakı parlament seçkilərindən dərhal sonraya təsadüf etməsi diqqət çəkir. Məlumdur ki, tərəflər ikitərəfli əlaqələri və regional proseslərin inkişafını diqqətdə saxlayıbar.

Türkiyəli siyasi şərhçi, dosent Levent Ersin Orallı görüşün əhəmiyyətini Crossmedia.az-a şərh edib: “Azərbaycan Prezidentinin köməkçisi Hikmət Hacıyev və Ermənistan Təhlükəsizlik Şurasının katibi Armen Qriqoryan arasında keçirilən işçi görüş Cənubi Qafqazda davamlı sülhün bərqərar olması üçün son dərəcə vacib bir hadisədir. Uzun müddətdir münaqişə, işğal və qeyri-sabitliyin hökm sürdüyü bir bölgədə tərəflər arasında birbaşa təmasın davam etdirilməsi sülh prosesinin ən dəyərli nailiyyətlərindən biri kimi qəbul edilməlidir. Liberal institusional yanaşma davamlı sülhün yalnız razılaşmalar vasitəsilə deyil, həm də davamlı dialoq mexanizmləri vasitəsilə mümkün olduğunu vurğulayır. Tərəflər arasında müntəzəm görüşlər anlaşılmazlıqların qarşısını alır, etimad quruculuğu tədbirlərini gücləndirir və danışıqlar mədəniyyətini təsis edir. Bu baxımdan, Hacıyev-Qriqoryan görüşü sadəcə texniki görüşdən daha çox əhəmiyyətə malikdir; bu, regionda etimad quruculuğunun davam etdirilməsini nümayiş etdirən strateji bir addımdır”.

O bildirib ki, oxşar proseslər İkinci Dünya Müharibəsindən sonra Avropada qurulan sülh nizamının əsasını təşkil etmişdir: “Bir vaxtlar döyüş meydanında bir-biri ilə qarşılaşan dövlətlər fasiləsiz diplomatik əlaqələri davam etdirərək düşmənçiliyi əməkdaşlığa çevirməyi bacardılar. Cənubi Qafqazın da oxşar bir transformasiya yaşaması üçün siyasi iradənin qorunması və dialoq kanallarının açıq saxlanılması çox vacibdir. Azərbaycanın 2020-ci ildə ərazi bütövlüyünü bərpa etməsindən sonra ortaya çıxan yeni geosiyasi reallıq regionda davamlı sülh üçün tarixi bir fürsət yaratdı. Bu gün baş tutan hər bir əlaqə təkcə iki ölkə arasındakı münasibətləri deyil, həm də regional sabitliyi, iqtisadi inteqrasiyanı və nəqliyyat dəhlizlərinin inkişafını dəstəkləyir. Buna görə də Hikmət Hacıyevin səfəri və keçirilən işçi görüşü keçmiş münaqişələrdən gələcək əməkdaşlığa gedən yolda mühüm mərhələlərdən biri hesab edilməlidir. Davamlı sülhə gedən yol dialoqdan, qarşılıqlı etimadı gücləndirməkdən və ortaq gələcək üçün iradəni qorumaqdan keçir”.

🖨 Çap et

13:30 15.06.2026

Oxunuş sayı: 61