Digər ölkələrdə sürücülərin maaşları ikiqat artıqdır- Ekspert
Sumqayıtda 123 saylı marşrut avtobusunun sürücüsünün narkotik maddə qəbul etdiyi şübhəsi ilə saxlanılması ictimai nəqliyyatda təhlükəsizlik və sürücü nəzarəti məsələlərini yenidən gündəmə gətirib.
Sərnişinləri təhlükəsiz şəkildə mənzil başına çatdırmağa məsul olan şəxslər onların həyatlarını təhlükəyə atırlar.
Bu barədə Crossmedia.az-a danışan nəqliyyat eksperti Adil Nəbiyev bildirib ki, bu tip hallar həm şəxsi avtomobillərdə, həm taksilərdə, həm avtobuslarda tez-tez baş verir:
"Bunun qarşısını almaq əslində çox çətin məsələdir. Çünki avtobus parkaları hər gün sürücünü sadəcə alkotestdən keçirə bilir. Bunun üçün aparatlardan istifadə edərək alkoltesti yoxlanır. Amma bəzi aparatlar keyfiyyətli olmadığından yanlış göstərə bilir. Alko yoxlamanın düzgün edilməsi üçün sertifikasiyadan keçmiş aparatlardan istifadə etmək lazımdır. Narkotik vasitədən istifadə probleminin yoxlanışı həftədə bir dəfə yoxlanılsa daha yaxşı olar. Ümumiyyətlə mexanizim həm dövlət qurumları məsələn yerüstü nəqliyyat agentliyi səhiyyə nazirliyi ilə əməkdaşlıq şəklində ciddi nəzarət etməlidir. Yoxlanış olduqdan sonra aşkar olunmanı sistemə mütləq şəkildə yerləşdirilir ki, bu haqda bütün qurumların məlumatı olsun".
Ekspert qeyd edib ki, bu tip hadisələr baş verməsi zamanı ciddi yoxlanış olmalıdır:
"Şirkətlərin ümumiyyətlə sürücüləri, işçiləri psixoloji test edilməsi lazımdır. Bu tip hadisələr baş verərsə, tək sürücünü yox, şirkətin rəhbərinidə məsuliyyətə cəlb etmək lazımdır. Motivasiya prosesi aparmaq lazımdır. Məsələn, yaxşı işçilərin ilin sonu mükafatlandırılması digər işçilərə də motivasiya olacaq. Müasir zamanda əslində bu cür halların qarşısını almaq gedikcə asanlaşacaq. Çünki hər yerdə süni intellekt artıq bu prosesi ələ alacaq və avtobusların içərisində də bu cür kameralar yerləşdiriləcək. Məqamların biri də budur ki, sürücülərin istədiyi kimi qazanclar olmur. Digər ölkələrdə sürücülərin maaşları ikiqat artıqdır. Bu əsas məqamlardan biridir".
Türkan Kərimli
18:33 10.10.2025
Oxunuş sayı: 951
