Uşaq nəşrlərinin biblioqrafiyası hazırlanıb
Azərbaycan milli mətbu irsində əhəmiyyətli yer tutan və 1906-1925-ci illərdə nəşr olunmuş “Dəbistan”, “Rəhbər”, “Məktəb” və “Məktəb məcmuəsi” uşaq jurnallarının biblioqrafiyası hazırlanaraq nəşr edilib. Nəşrin müəllifi Bakı Slavyan Universitetinin müəllimi, mətbuat tədqiqatçısı Fərqanə Məlikovadır.
Crossmedia.az xəbər verir ki, jurnallardakı materialların məzmun və müəllifləri haqqında bilgi verilməsi baxımından bu biblioqrafiya ilk təşəbbüsdür. Nəşrlər haqqında ümumi təsəvvür yaradan biblioqrafiyada yazıların müəllifləri, dərc olunduğu tarix, nömrə sayı və səhifələr qeyd olunmuşdur.
Qeyd edək ki, “Dəbistan” jurnalının 1906-1908-ci
illərdə 27 nömrəsi, “Rəhbər” jurnalının 1906-1907-ci illərdə 5 nömrəsi, “Məktəb”
jurnalının isə 1911-1920-ci illərdə 97 nömrəsi, “Məktəb məcmuəsi” jurnalının
1925-ci ildə 1 nömrəsi nəşr edilmişdir. Biblioqrafiyada bütün bu illər, günlər
üzrə nəşr olunmuş materiallar sistemli və ardıcıl şəkildə öz əksini tapmışdır.
Biblioqrafiyanın məsləhətçisi filologiya üzrə
fəlsəfə doktoru Aygün Əzimova, rəyçilər siyasi elmlər doktoru, professor Vüqar
Rəhimzadə və filologiya elmlər doktoru, professor Qulu Məhərrəmlidir.
“Zərdabi nəşr”də kütləvi tirajla çap olunmuş uşaq nəşrlərinin
biblioqrafiyasının redaktoru BDU-nun Mətbuat tarixi kafedrasının müəllimi Samir
Xalidoğludur.
12:17 26.09.2025
Oxunuş sayı: 2664
