Messi milli komandaya qol və assistlərlə vida etdi
Lionel Messi Argentina millisində keçirdiyi son oyunda qol vuraraq komandasının Benini 3:0 hesabı ilə məğlub etdiyi görüşə damğasını vurub.
Crossmedia.az xəbər verir ki, Reuters bu barədə məlumat yayıb.
Buenos-Ayresdə keçirilən qarşılaşmada Messi matçın sonunadək meydanda olub. O, Nikolas Otamendi və Niko Pasın qollarında məhsuldar ötürmə verib, 71-ci dəqiqədə isə penaltidən hesabı 3:0 edib.
39 yaşlı futbolçu Argentina millisində 208-ci oyununa çıxıb və 126-cı qolunu vurub. Hər iki göstərici milli komandanın rekordudur.
Messi Argentina ilə 2022-ci ildə dünya çempionu olub, həmçinin iki dəfə Amerika Kubokunu qazanıb. O, səkkiz dəfə “Qızıl top” mükafatına layiq görülərək bu göstərici üzrə də rekordçudur.
Matçdan sonra emosiyalarını gizlədə bilməyən Messi Argentina millisinin formasını 20 ildən artıq geyinməyin onun üçün böyük qürur olduğunu bildirib.
“Bu formanı 20 il geyinmək inanılmaz qürur idi. Mən bütün gücümü verdim. Bütün həyatım boyu oynamaq istərdim, amma başa düşürəm ki, bu fəsil artıq başa çatıb”, – Messi deyib.
Messinin vida matçını Buenos-Ayresdəki “Monumental” stadionunda 85 mindən çox azarkeş izləyib. Görüşdən sonra futbolçular, rəqib komandanın üzvləri və hakim heyəti Messi ilə vidalaşıb.
11:53 07.10.2026
Oxunuş sayı: 63
