ATU rektoru tələbə adı qazanmış gənclərin qəbul prosesini izləyib
Avqustun 28-dən etibarən Azərbaycan Tibb Universitetinin tələbəsi adını yeni qazanmış gənclərin qeydiyyatına start verilib.
Bu barədə Crosmedia.az-a Azərbaycan Tibb Universitetindən məlumat verilib.
2025/2026-cı tədris ilində birinci kurs tələbəsi olacaq şəxslər tələb olunan sənədləri təqdim edərək qəbul olunduqları fakültələr üzrə qeydiyyata düşürlər.
Bu gün Azərbaycan Tibb Universitetinin rektoru, professor Gəray Gəraybəyli qəbul prosesini izləyib. O, sənədlərin qeydiyyatı prosesinin gedişi ilə tanış olub, qəbulu aparan ATU nümayəndələri ilə söhbət edib, hansısa narahatlığın olub-olmaması ilə maraqlanıb.
G.Gəraybəyli qəbula gələn valideynlərlə də görüşüb, övladlarının ATU tələbəsi adını qazanması münasibətilə onları təbrik edib. Rektor birinci kurs tələbələrinə təhsildə uğurlar arzulayıb, xalqımız üçün layiqli kadr kimi yetişməyi diləyib.
Qeyd edək ki, ATU-da qeydiyyat prosesi sentyabrın 8-nə qədər aparılacaq.
14:04 04.09.2025
Oxunuş sayı: 6175
