Alyaskada sammit: sülh, təzyiq və yeni “qırmızı xətlər”
Alyaskada keçirilən danışıqlar ABŞ prezidenti Donald Tramp və Rusiya lideri Vladimir Putin arasında konkret razılaşma olmadan başa çatsa da, həm Ukrayna, həm də Avropa və dünya üçün mühüm siqnallar verdi.
Crossmedia.az xəbər verir ki, bu barədəThe Wall Street Journal yazır ki, Tramp Avropa liderləri ilə görüşdə ilk dəfə açıq şəkildə ABŞ-nin Ukraynaya birbaşa təhlükəsizlik zəmanəti verməyə hazır olduğunu bəyan edib.
CNN dəqiqləşdirir ki, bu zəmanətlər NATO-nun 5-ci maddəsinə bənzəyəcək, lakin alyansı kənarda qoyaraq yalnız ABŞ və Aİ-nin dəstəyi ilə, həm də yalnız sülh sazişi əldə olunduğu halda qüvvəyə minəcək.
Bu, Ukrayna üçün ilk dəfə “Amerika-Avropa zəmanətlərinin” mümkünlüyü barədə siqnal deməkdir.
Axios məlumat verir ki, Putin mövqeyində Sumi və Xarkov bölgələrinin taleyini müzakirəyə açıq görünür. Lakin Moskva hələlik konkret təklif irəli sürməyib və sadəcə taktiki maraq nümayiş etdirir.
Kiyev üçün bu məsələ hələ də “qırmızı xətt” olaraq qalır.
Reuters xəbər verir ki, Prezident Volodimir Zelenski Tramp və Avropa liderləri ilə danışıqlarda Donbasla bağlı hər hansı güzəştə qətiyyən razı olmadığını bildirib.
O, həmçinin Rusiyanın yaxın günlərdə yeni hücumlara hazırlaşdığını və daha əlverişli mövqe qazanmaq üçün döyüşləri gücləndirəcəyini xəbərdarlıq edir.
Qeyd edək ki, Avropa liderləri də prosesə aktiv qoşulub.
Polşa prezidenti Donald Tusk: “Ukraynanın gələcəyi və Polşa da daxil olmaqla Avropanın təhlükəsizliyi həlledici mərhələyə qədəm qoyub".
Almaniya kansleri Fridrix Merts : “Ukrayna Avropanın sarsılmaz həmrəyliyinə arxalana bilər".
Avropa ABŞ-lə mövqelərini sinxronlaşdıraraq Trampın sülh təşəbbüslərinə dəstək verib.
Beləliklə, Alyaska sammiti konkret sazişlə nəticələnməsə də, siyasi vəziyyətin “kristallaşma nöqtəsinə” çevrildi: Ukrayna öz qırmızı xətlərini möhkəmləndirdi, ABŞ misilsiz zəmanətlərə hazır olduğunu bildirdi, Avropa isə tam şəkildə prosesə daxil oldu.
Xumar Emilqızı
10:43 17.08.2025
Oxunuş sayı: 6800
