Rusiyalı deputat: "Mən Azərbaycanı təhdid etməmişəm"
“Azərbaycan hakimiyyətini təhdid etməmişəm, sadəcə Azərbaycan məhsullarının idxalının dayandırılması və ‘Xüsusi Hərbi Əməliyyat’ anlayışının sərhəd boyunca müxtəlif formalarda tətbiq oluna biləcəyini demişəm”.
Crosssmedia.az xəbər verir ki, bunu Rusiya Dövlət Dumasının deputatı, general-leytenant Andrey Qurulyov RTVI-yə müsahibəsində bildirib.
Parlamentari çıxışının Bakıda eşidildiyini qeyd edib və respublikanın rəsmi nümayəndələrinə “nə baş verəcəyini diqqətlə düşünməyi” tövsiyə edib. O, bu sözləri azərbaycanlı deputat Rasim Musabəylinin onun son bəyanatlarına verdiyi reaksiyanı şərh edərkən deyib.
“Axı mən onlara təhdid etməmişəm. Yazını diqqətlə izləyin. Orada bir neçə əsas məqam var. Mən, əgər videoya baxsanız, konkret olaraq belə demişəm: böyük qonşu ilə, özü də heç bir əsas olmadan münasibətləri korlamaq üçün çox da ağıla ehtiyac yoxdur. İkincisi – əgər məsələ bu şəkildə qoyulursa, münasibətlər pisləşərsə, zərərə düşəcək tərəf məhz Azərbaycan olacaq. Üçüncüsü – Rusiyadan enerji daşıyıcılarının ixracı Azərbaycana da mümkün olmayacaq. Dördüncüsü – orada NATO-dan kiminsə peyda olacağı ilə bağlı vacib bir məqam var (nədənsə bu barədə susurlar). Bu, qəbuledilməzdir. Xatırladım ki, Ukraynada xüsusi hərbi əməliyyat məhz bu ölkənin NATO-ya qoşulmaq cəhdləri səbəbindən başladı. Bu, əsas məsələdir, elə deyilmi? Bax, məsələ budur”, – deyə Qurulyov bildirib.
O əlavə edib: “Ən vacibi odur ki, mənim çıxışımı tam şəkildə görmədilər, sizi əmin edirəm. Amma eşitdilər. Qoy indi diqqətlə fikirləşsinlər ki, sonra nə olacaq”.
Musabəylinin ünvanına səsləndirdiyi fikirlərlə bağlı rəy verməsi istəndikdə isə Qurulyov belə cavab verib: “Müxtəlif axmaqların açıqlamalarına reaksiya vermək fikrim yoxdur”. Bununla yanaşı, general azərbaycanlı deputatın Rusiya ilə Azərbaycan arasında hərbi əməliyyatların mümkün olmaması barədə dağlıq sərhəd relyefinə istinad edən fikirlərinə də münasibət bildirib.
“Hamınıza xatırladıram, əziz dostlar, Çeçenistanı yaddan çıxarmayın. Orada dağlar az deyildi”, – deyə Qurulyov qeyd edib.
19:32 13.08.2025
Oxunuş sayı: 8365
