Ermənistanın sabiq müdafiə naziri: “Uğur kimi təqdim edilə biləcək heç nə görmürəm”
“Təhlükəsizliyin təmin edilməsi ilə bağlı hələlik heç bir dəyişiklik aparılmayıb, yəni yerində heç nə həyata keçirilməyib”.
Bunu Ermənistanın sabiq müdafiə naziri David Tonoyan deyib.
Crossmedia.az xəbər verir ki, onun sözlərinə görə, deklarativ bəyanatlar var, onların nəticələri və davamlılığının təmin edilməsi yaxın vaxtlarda görünəcək.
“Sevinmək və ya hər hansı bir şeyə diqqət yetirmək kimi problemim yoxdur, uğur kimi təqdim edilə biləcək heç nə görmürəm”, - deyə Tonoyan qeyd edib.
Tonoyan Vaşinqtonda ilkin imzalanmış “Ermənistan ilə Azərbaycan Respublikası arasında sülh və dövlətlərarası münasibətlərin qurulması haqqında” sazişə toxunaraq bildirib ki, bu mərhələdə hər hansı qiymət verə bilməz, çünki hər şey yalnız təhlükəsizliyin təmin olunması və dəqiq sərhədlərin müəyyənləşdirilməsi baxımından praktiki addımlar atıldıqdan sonra aydın olacaq.
O qeyd edib ki, yol haqqında heç kim əlavə nəsə deyə bilməz, çünki layihə, tikinti baxımından həmin yolun nəyi əks etdirəcəyi, hansı ölkələrin iştirak edəcəyi, coğrafi olaraq hansı ərazidən keçəcəyi bəlli deyil.
“Mehridən keçəcək, yoxsa yox?” sualına Tonoyan belə cavab verib: “Yalnız bu suallara cavab tapıldıqdan sonra ehtimallar irəli sürmək olar”.
10:31 13.08.2025
Oxunuş sayı: 843
