Kaya Kallas: Bakı-İrəvan razılaşması onilliklərlə davam edən münaqişəyə son qoymaqda sıçrayışdır
Azərbaycan Prezidenti İlham Əliyev və
Ermənistanın Baş naziri Nikol Paşinyan tərəfindən Ağ Evdə Prezidenti Donald
Trampın iştirakı ilə Bakı və İrəvan arasında imzalanmış bugünkü sazişlər
onilliklərlə davam edən münaqişəyə son qoyan tarixi sıçrayışı qeyd edir.
Crossmedia.az xəbər verir ki, Avropa
bürosunun məlumatına görə, bu barədə Avropa İttifaqının (Aİ) xarici işlər və
təhlükəsizlik siyasəti üzrə ali nümayəndəsi Kaya Kallasın bəyanatında deyilir.
Qeyd olunur ki, Avropa İttifaqı hər iki
tərəfin və “əlverişli anı ələ keçirməyi bacaran və bu mühüm irəliləyişi mümkün
edən” ABŞ administrasiyasının səylərini qətiyyətlə alqışlayır.
“Bu ilin martında Azərbaycan və Ermənistan
arasında sülh sazişinin mətni üzrə ikitərəfli danışıqların yekunlaşmasından
sonra bugünkü tədbir iki dövlət arasında münasibətlərin tam normallaşması
istiqamətində mühüm və həlledici addımdır”, - Avropa diplomatiyasının rəhbəri
bəyanatında bildirib.
Onun sözlərinə görə, saziş 1991-ci il
Alma-Atı Bəyannaməsinə uyğun olaraq suverenliyin, ərazi bütövlüyünün və
sərhədlərin toxunulmazlığının qarşılıqlı tanınmasına əsaslanır.
“Bugünkü tədbirin və razılaşdırılmış
tədbirlərin həyata keçirilməsinin bütün regionun dinc inkişafına müsbət təsir
edəcəyi və cəmiyyətlərin davamlı sülhə və ortaq rifaha yaxınlaşmasına kömək
edəcəyi gözlənilir.
Avropa İttifaqı Ermənistan və Azərbaycan
arasında münasibətlərin normallaşması prosesini tam dəstəkləyir və uzun illər
davamlı sülh üçün şərait yaratmaq üçün hər iki tərəf və beynəlxalq
tərəfdaşlarla işləyib. Biz tam normallaşmaya nail olmaq, əlavə dəstək
göstərmək, o cümlədən növbəti addımların praktiki həyata keçirilməsi üçün
tərəfdaşlarla əməkdaşlığa hazırıq”, - sənəddə deyilir.
02:51 09.08.2025
Oxunuş sayı: 974
