Xarici xəbərlər

Havada deyil, şəbəkədə çökdü – “Aeroflot”a kiberhücum

Rusiyanın “Aeroflot” aviaşirkətinin informasiya sistemlərində 28 iyul tarixində baş vermiş genişmiqyaslı nasazlığa görə onlarla aviareys ləğv edilib.

Crossmedia.az xarici mediaya istinadən bildirir ki, özünü “Silent Crow” adlandıran haker qrupu bu hadisəyə görə məsuliyyəti öz üzərinə götürüb.

Hakerlər iddia edir ki, şirkətin daxili IT infrastrukturunu tamamilə sıradan çıxarıb və məhv ediblər. Onların sözlərinə görə, bir il ərzində “Aeroflot”un korporativ şəbəkəsinə çıxış imkanları olub və bu müddətdə uçuş tarixçəsi də daxil olmaqla böyük həcmdə məlumat əldə ediblər.

Qrupun bildirdiyinə görə, təxminən 7000 fiziki və virtual server məhv edilib. Həmçinin kritik korporativ sistemlər, işçilərin, o cümlədən rəhbər şəxslərin kompüterləri də sındırılıb.

Onlar dinləmə serverləri, müşahidə və işçi nəzarət sistemlərindən də məlumat əldə etdiklərini, ümumilikdə 12 terabaytlıq informasiya topladıqlarını açıqlayıblar. “Silent Crow” yaxın günlərdə bu məlumatları dərc edəcəyini vəd edib.

Zəhra Ağayeva

🖨 Çap et

15:12 28.07.2025

Oxunuş sayı: 1163