ABŞ Ukraynaya dağıdıcı hücum silahları verə bilər - Rəy
ABŞ-nin prezidenti Donald Tramp Rusiyaya qarşı sərt xəbərdarlıq edib. Onun sözlərinə görə, əgər Moskva yaxın 50 gün ərzində sülh sazişi imzalamaz və atəşkəs elan etməzsə, ABŞ Rusiyaya qarşı ikinci dərəcəli, lakin təsirli sanksiyalar tətbiq edəcək. İndiyə qədər saysız sanksiyalarla üzləşmiş Rusiyanı bu dəfə hansı iqtisadi və siyasi nəticələr gözləyir? Və ən əsası Rusiya bu sanksiyalara cavab verə biləcəkmi?
Məsələ ilə bağlı politoloq Elçin Xalidbəyli Crossmedia.az-a açıqlama verib. Onun sözlərinə görə, Tramp Putinə konkret olaraq 50 günlük möhlət verib ki, bu müddət ərzində sülh sazişi imzalansın və atəşkəs elan edilsin: “Əks halda, ABŞ Rusiyaya qarşı daha sərt və radikal addımlar atacağını bəyan edib. Bu sərt addımların sırasında Rusiyaya qarşı yeni sanksiya paketlərinin qəbulu da yer alır. Digər tərəfdən, Tramp Administrasiyası bəyan edib ki, əgər möhlət başa çatdıqdan sonra Kremlin tələblərə cavab verilməzsə, Ukraynaya ən müasir hücum silahları veriləcək. Həmçinin, Ukraynaya hərbi dəstək daha da intensivləşdirilə bilər.
Bu iki radikal addım Rusiyanın mövcud vəziyyəti üçün dağıdıcı nəticələr doğura bilər. Artıq rusiyalı iqtisadçıların açıq və ya dolayı etiraflarına əsasən, Rusiya iqtisadiyyatı çökmə mərhələsinə yaxınlaşıb. Hətta bəzi proqnozlara görə, gələn ilin ortalarına qədər ölkədə iqtisadi xaosun yaranması mümkündür. Üstəlik, Rusiya iqtisadiyyatı Ukrayna müharibəsinin yükünü daşımaqda ciddi çətinlik çəkir. Hərbi iqtisadiyyat tamamilə zəifləyib. Hərbi-sənaye kompleksi Rusiya ordusunun silah, sursat və texnika ehtiyacını ödəməkdə acizdir.
Rusiya bu səbəbdən intensiv şəkildə İran, Şimali Koreya və Çin kimi ölkələrdən silah-sursat idxal etməyə məcbur qalıb. Həm iqtisadi, həm də hərbi resursların tükəndiyi bir şəraitdə ABŞ-ın atacağı yeni addımlar, xüsusilə iqtisadi sanksiyalar, Rusiyanın hələ sanksiyaya məruz qalmamış sahələrini də hədəfə alacaq. Bu isə həmin sahələrdə böhran yaradaraq bütövlükdə ölkə iqtisadiyyatının daha da ağır vəziyyətə düşməsinə səbəb ola bilər”.
Politoloqun fikrincə, Rusiya üçün çətin günlər təkcə bitmək üzrə deyil indi onu daha da ağır günlər gözləyir:
“İndiki mərhələni Rusiya yaxın aylarda xatırlamalı olacaq və bu mərhələni geri qaytarmaq Rusiya üçün çox çətin olacaq. Digər tərəfdən, Rusiya ordusunda olduqca böhranlı bir vəziyyət hökm sürür. Təbii ki, Kreml bunu etiraf etmək istəmir, ancaq bəzi məlumatlara əsasən, Rusiya ordusu hərbi təchizat baxımından ağır vəziyyətdədir.
Bundan əlavə, Rusiya əhalisi artıq orduda döyüşmək istəmir. Hərbi səfərbərlik prosesindən yayınmaq üçün müxtəlif yollar axtarılır. Daha bir ciddi problem isə Rusiya ordusunda peşəkar hərbi kadr çatışmazlığıdır. Bu, döyüş əməliyyatlarının aparılmasında ciddi problemlərə səbəb olmaqla yanaşı, canlı qüvvə itkilərinin də artmasına gətirib çıxarır.
Bütün bu göstəricilər onu deməyə əsas verir ki, Rusiya üçün daha ağır günlər hələ qarşıdadır. Rusiya Ukraynaya qarşı başladığı işğalçı müharibənin siyasi və hərbi məsuliyyətini daşımaq məcburiyyətindədir”.
Politoloq sonda vurğuladı ki, bu baxımdan demək olar ki, 50 günlük möhlət başa çatdıqdan sonra Ukraynaya daha dağıdıcı hücum silahlarının verilməsi Rusiyada savaşın ağırlığını daha dərin şəkildə hiss etdirəcək: “Çünki Ukrayna ordusu həmin müasir silahlarla Rusiyanın dərinliklərində yerləşən strateji hərbi obyektləri, infrastrukturunu və məhsul istehsalı ilə məşğul olan zavodları hədəf almağa başlayacaq. Bu da Rusiya iqtisadiyyatını və hərbi sektorunu daha da ağır vəziyyətə salacaq.
Yəni əgər Rusiya mövcud durumunu qoruyub saxlamaq istəyirsə, Ukrayna ilə sülh sazişi imzalamağa məcburdur. Əks halda, Rusiya bu gün yaşadığından da daha qaranlıq bir dövrə məhkum qalacaq”.
Həmayıl
16:46 26.07.2025
Oxunuş sayı: 781
