Beynəlxalq Muğam Mərkəzində IV Bakı Piano Festivalı çərçivəsində növbəti konsert keçirilib
IV Bakı Piano Festival çərçivəsində Beynəlxalq Muğam Mərkəzində pianoçu Rüya Taner (Şimali Kipr), pianoçu Yeganə Axundova (Azərbaycan) və dirijor Valid Ağayevin (Türkiyə) rəhbərliyi altında Bakı Kamera Orkestrinin iştirakı ilə klassik musiqi konserti keçirilib. Mərkəzin foyesində “Arts Council of Azerbaijan” təşkilatının təşəbbüsü ilə müasir azərbaycanlı rəssamların əsərlərindən ibarət sərgi də təqdim olunub.
“Arts Council of Azerbaijan” təşkilatının rəhbəri Dadaş Məmmədov sərgiyə hazırlıq prosesindən danışıb: “Bakı Piano Festival çərçivəsində biz bir sıra vorkşoplar təşkil etdik. Bu vorkşoplar zamanı “Arts Council of Azerbaijan”ın üzvü olan müasir azərbaycanlı rəssamlar fortepiano mövzusunda əsərlər ərsəyə gətirdilər. Nəticədə burada bu gün nümayiş olunan 17 əsərdən ibarət böyük bir kolleksiya formalaşdı. Festivala artıq neçə ildir dəstək veririk və sevinirik ki, bu layihəyə rəssamları da cəlb edə bilirik. Çünki musiqi və rəssamlıq bir-birindən ayrılmaz sahələridir. Vorkşoplarımız çox rahat bir mühitdə keçirdi. Bəzi sessiyalar canlı musiqi müşayiəti ilə, caz improvizasiyaları zamanı təşkil olunurdu. Bu, həqiqətən də çox gözəldir!
Bakı çox yaradıcı bir şəhərdir və istedadlı insanları bir araya gətirərək yeni maraqlı layihələr həyata keçirmək istəyirik”.
Konsert başlamazdan əvvəl musiqiçilər AZƏRTAC-ın müxbiri ilə IV Bakı Piano Festivalında iştirakdan əldə etdikləri təəssüratlarını bölüşüblər. Egyana Axundova pianoçu, bəstəkar və Azərbaycanın Əməkdar artistidir.
“Bakı Piano Festivalında böyük məmnuniyyətlə iştirak edirəm. Belə bir festivalın, xüsusilə də bizim Azərbaycan fortepiano məktəbi üçün çox vacib olan bu tədbirin keçirilməsi əslində möhtəşəm hadisədir. Festivalın özəlliyi ondadır ki, burada tamamilə fərqli musiqi janrları yer alır: klassika, caz və müxtəlif eksperimental çıxışlar. Yaş fərqindən asılı olmayaraq, festivalda həm məşhur peşəkar musiqiçilər, həm də istedadlı uşaqlar iştirak edirlər. Həm yerli, həm də tanınmış xarici musiqiçilər burada təmsil olunur.
Bu gün, məsələn, mən Şimali Kiprdən olan gözəl pianoçu Rüya Taner ilə bir səhnəni paylaşacağam və bu, məni çox sevindirir. Mən Bakı Kamera Orkestri ilə çıxış edəcəyəm, orkestrin dirijoru isə gənc və istedadlı musiqiçi Valid Ağayevdir. O, Azərbaycan dirijorluq məktəbinin gələcəyidir və inanıram ki, onun çox parlaq bir yolu olacaq.
Bu festivala görə caz pianoçumuz Şahin Növrəsliyə təşəkkür edirəm. O, Azərbaycan caz məktəbini beynəlxalq arenada tanıdır və biz onunla fəxr edirik”, – deyə Yeganə Axundova vurğulayıb.
Valid Ağayev Adana şəhərindəki Çukurova Universiteti Dövlət Konservatoriyasının müəllimi, Mersin Şəhər Orkestrinin dirijorudur. “Konsertdən əvvəl xoş bir həyəcan içindəyəm. Konsertdə mənə yaxın və dəyərli insanlar iştirak edir: Azərbaycanın Xalq artisti, pianoçu Yeganə xanım Axundova, Şimali Kipr Türk Respublikasının Xalq artisti Rüya Taner. Bu konsert mənim üçün çox önəmlidir. Mən ilk dəfədir ki, möhtəşəm musiqiçi Yeganə Axundova ilə və heyrətamiz Bakı Kamera Orkestri kollektivi ilə birgə çıxış edəcəyəm. Bu festivalı çox sevirəm və burada çıxış etmək mənə böyük sevinc hissi yaşadır! Ümid edirəm ki, hər şey uğurla keçəcək. Şahin və Natavan Növrəslini, həmçinin bu axşamın bütün iştirakçılarını musiqi bayramı münasibətilə təbrik edirəm. Düşünürəm ki, tədbir uğurla alındı”, – deyə Valid Ağayev əlavə edib.
Rüya Taner pianoçu, Şimali Kipr Türk Respublikasının Əməkdar artistidir: “Mən Azərbaycana artıq altıncı dəfədir gəlirəm. Müxtəlif tədbirlərdə, ölkənin müxtəlif səhnələrində çıxış etmişəm. Lakin Bakı Piano Festivalında ilk dəfədir çıxış edirəm. Bu layihənin bir hissəsi olduğum üçün çox şadam. Məni bu layihəyə dəvət etdiyinə görə Şahin Növrəsliyə təşəkkür edirəm”.
Konsert iki hissədən ibarət olub və böyük uğurla keçib.
IV Bakı Piano Festival iyunun 28-dək davam edəcək. Paytaxt sakinləri və qonaqlar üçün müxtəlif janrlarda musiqilərin təqdim olunacağı zəngin konsert proqramı nəzərdə tutulub.
Bakı Piano Festivalı çərçivəsində, həmçinin müxtəlif art layihələr, sərgilər və caz improvizasiyaları (cem-seyşnlər) planlaşdırılıb.
Festivalın xüsusi fəxri isə “We Are the Future” adlı gənc istedadların konsertidir. (Azərtac)
06:27 24.06.2025
Oxunuş sayı: 972
