Səyyar Gənclər Xidməti bu dəfə Kürdəmir gəncləri üçün fəaliyyət göstərib
Azərbaycan Respublikasının Gənclər Fondunun dəstəyi, Gənclərin İnkişaf və Karyera Mərkəzi və “Gənc Könüllülər” İctimai Birliyinin birgə təşkilatçılığı ilə həyata keçirilən “Səyyar Gənclər Xidməti” layihəsi oktyabrın 5-dən 9-dək Kürdəmirdə fəaliyyət göstərib.
Crossmedia.az xəbər verir ki, layihə çərçivəsində gənclərə müxtəlif istiqamətlər üzrə xidmətlər təqdim olunub.
Bu il “Gənclərlə, gənclər üçün” devizi altında keçirilən layihənin əsas məqsədi dövlət gənclər siyasəti çərçivəsində yaradılan imkan və xidmətləri, xüsusilə məşğulluq, innovasiya və rəqəmsallaşma sahəsindəki təşəbbüsləri region gəncləri üçün daha əlçatan etməkdir.
Layihənin Kürdəmirdə keçirilən açılış mərasimi Azərbaycan Respublikasının Dövlət Himninin səsləndirilməsi və Vətənimizin ərazi bütövlüyü və suverenliyi uğrunda şəhid olan qəhrəmanların xatirəsinin yad edilməsi ilə başlayıb.
Rəsmi hissədə Kürdəmir Rayon İcra Hakimiyyəti başçısının müavini Ağali Kərimli və Gənclərin İnkişaf və Karyera Mərkəzinin şöbə müdiri Aqil Quliyev çıxış ediblər. Çıxışlarda layihənin gənclərin şəxsi inkişafı, karyera planlaması və ictimai fəallığının artırılması baxımından əhəmiyyəti vurğulanıb.
Beş gün davam edən proqram çərçivəsində “Vətənpərvərlik”, “Təhsil və karyera”, “Rəqəmsal düşüncə”, “Fiziki aktivlik və sağlamlıq”, “Yaradıcı gənclik” və “Əyləncə” zonaları fəaliyyət göstərib. Gənclər bu zonalarda təşkil olunan vörkşoplarda, ustad dərslərində, viktorinalarda və intellektual yarışlarda iştirak edərək yeni biliklər qazanıb, praktiki bacarıqlarını inkişaf etdiriblər.
Bundan əlavə, həftə ərzində Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyası və 8 saylı Regional Ekologiya və Təbii Sərvətlər İdarəsi tərəfindən maarifləndirici sessiyalar keçirilib. Kürdəmir Peşə Liseyi isə sərgi təşkil edib.
Peşəkar mütəxəssislərin apardığı təlimlərdə ixtisas seçimi, karyera planlaşdırılması, şəxsi inkişaf, süni intellekt texnologiyalarının yaratdığı imkanlar və sağlam həyat tərzi mövzuları müzakirə olunub.
Qeyd edək ki, noyabr ayınadək ölkənin 20 şəhər və rayonunda 8 mindən çox gənci əhatə etməsi nəzərdə tutulan layihə indiyədək Şəki, Oğuz, Qəbələ, İsmayıllı, Ağsu, Şamaxı, Qobustan, Xızı, Lənkəran, Astara, Lerik, Yardımlı və Salyanda həyata keçirilib.
14:58 09.10.2026
Oxunuş sayı: 211
