"Donald Tramp İrana qarşı hərbi zərbələrin əleyhinədir" - Politoloq
Yaxın Şərqdə səssiz, amma təhlükəli bir gərginlik hökm sürür. Son məlumatlara görə, İsrail İranın nüvə obyektlərinə qarşı hərbi əməliyyata hazırlaşır. “İran təhdidlərə lazımi cavab verməyə tam hazırdır”. Bunu İran Ordusunun baş komandanı, general-mayor Əbdülrəhim Musəvi İsrail rəsmilərinin son həftələrdə İranın nüvə obyektlərinə zərbələr endirməsi ilə bağlı ritorikasına münasibət bildirərkən deyib. Bəs görəsən, İsrailin İranın nüvə obyektlərinə hücum ehtimalı nə dərəcədə realdır?
Məsələ ilə bağlı politoloq Elçin Xalidbəyli Crossmedia.az-a açıqlama verib. Onun sözlərinə görə, son məlumatlar göstərir ki, İsrailin İranın nüvə obyektlərinə zərbə endirməyə hazırlaşması ilə bağlı ciddi planları mövcuddur və bu istiqamətdə hazırlıq prosesi demək olar ki, yekunlaşmaq üzrədir: “Lakin məsələ yalnız İsraildən asılı deyil. İsrail ABŞ-ın birbaşa dəstəyi olmadan İrana qarşı hərbi əməliyyatlara daha dəqiq desək, İranın hərbi-strateji və nüvə obyektlərinə zərbə endirməyə cəhd etməz. Bu səbəbdən, İsrail ilk növbədə ABŞ-ın razılığını və siyasi-hərbi dəstəyini almağa çalışacaq.
Hətta yayılan son məlumatlara əsasən, bu məsələ ilə bağlı İsrailin Baş naziri ilə ABŞ Prezidenti arasında telefon danışığı da baş tutub. Lakin məlumata görə, ABŞ Prezidenti Donald Tramp İrana qarşı hərbi zərbələrin əleyhinədir. Ağ Evdə hesab olunur ki, İranla bağlı problemlər, xüsusən də nüvə obyektləri məsələsi siyasi-diplomatik yollarla həll edilməlidir”.
Politoloq sonda vurğulayıb ki, ABŞ hazırda İranla hərbi münaqişədə maraqlı deyil və rəsmi Tehranla mövcud problemləri danışıqlar masası arxasında müzakirə etməyə üstünlük verir: “Böyük ehtimalla proses də bu istiqamətdə inkişaf edəcək, çünki ABŞ-ın açıq dəstəyi olmadan İsrailin İrana hərbi zərbə endirməsi real görünmür”.
Həmayıl Şükürlü
15:54 27.05.2025
Oxunuş sayı: 1327
