Bu razılıq Yaxın Şərqdə muharibənin qarşısını ala bilər - RƏY
Son dövrlərdə beynəlxalq diplomatiya səhnəsində diqqət mərkəzində olan əsas məsələlərdən biri ABŞ və İran arasında aparılan danışıqlardır. Bu danışıqlar, Romada keçirilən və artıq beşinci raunduna çatmış görüşlər vasitəsilə davam edir. Eyni zamanda, ABŞ Prezidenti Donald Trampın Rusiya və Ukrayna arasındakı münaqişənin həlli istiqamətində göstərdiyi səylər də beynəlxalq ictimaiyyətin diqqətindən yayınmır. Lakin həm İranla nüvə məsələsi ətrafında aparılan dialoqlar, həm də Rusiya-Ukrayna arasında vasitəçilik cəhdləri hələlik arzuolunan nəticəni verməyib. Bu isə regionda sabitliyə və təhlükəsizliyə dair sualları gündəmə gətirir.
Mövzu ilə bağlı politoloq Əlimusa İbrahimov Crossmedia.az-a açıqlamasında bildirib: "Bu gün diqqət Romada keçiriləcək görüşlərdədir. ABŞ və İran arasında görüşlərin artıq beşinci raundu keçirilir və hər raunddan sonra tərəflər müəyyən nəticələrin əldə olunması ilə bağlı raport verirlər. Amma 5-ci raund keçirilməsinə baxmayaraq ortada ciddi nəticələr yoxdur. Nəticələrin olmaması növbəti görüşlərin keçirilməməsi demək deyil, tərəflər ümid edirlər ki, sonda nəticə əldə edəcəklər. ABŞ prezidenti Donald Trampın Rusiya və Ukrayna arasındakı münaqişənin həll olunması yaxud atəşkəsin əldə olunması yolunda atdığı addımlar və görüşlər də ciddi nəticələr verməyib. Bu da onu göstərir ki, D.Tramp üzərinə götürdüyü öhdəlikləri tam yerinə yetirmədi. D.Tramp Rusiya Ukrayna arasında münaqişənin həll edilməsi istiqamətində vasitəçilikdən geri çəkilir".
Politoloq daha sonra əlavə edib: "Təbii ki, ABŞ Romada İranla da danışıqlardan nəticə əldə olunmasında maraqlıdır. Romaya yola düşən İran XİN rəhbərinin dediyinə görə müəyyən narazılıqlar var. Uzlaşa bilinməyən məsələlər var, bu məsələlər nələrdir? Əslində indiki mərhələdə söhbət uranın zənginləşdirilməsindən gedir və ABŞ tərəfinin bildirdiyinə görə onlar İranın uranı zənginləşdirmək məsələsini əlindən almaq istəyirlər. İran uranın səhiyyə vasitələrində və tibbi sahələrdə, kənd təsərrüfatında, iqtisadiyyatda bir sözlə dinc məqsədlə istifadə edəcəyini bildirir. İranın urani zənginləşdirmək məqsədi nüvə silahı zəurətində deyil. İndiki mərhələdə söhbət İranin uranin zənginləşdirilməsi məsələsində razılıq əldə olunmasından gedir. Əgər bu sahədə razılıq əldə olunarsa ya ABŞ İrana icazə verməlidir ki, uranın zəif zənginləsdirməsini özü həyata keçirsin yaxud danışıqlar kəsilməlidir. ABŞ təkid edir ki, İran uranın zənginləsdirilməsi ilə qəti məşğul ola bilməz. Qeyd etdiyim kimi diqqət sabah və birisi gün keçiriləcək görüşlərdədir. Həm ABŞ həm İran ciddi şəkildə razılıq əldə etməkdə maraqlıdır. Və onların razılıq əldə etməsi yaxın şərqdə baş verə biləcək müharibənin qarşını almaq deməkdir".
Ayhan Ağarzayev
12:56 23.05.2025
Oxunuş sayı: 12101
