"İrana qarşı sanksiyalar davam edəcək"- Siyasi şərhçi
Beynəlxalq münasibətlər sistemində sanksiyalar, xüsusilə də iqtisadi sanksiyalar, dövlətlərarası təzyiq və təsir vasitəsi kimi geniş tətbiq olunur. ABŞ-nin İrana qarşı tətbiq etdiyi sanksiyalar da bu siyasətin bariz nümunələrindəndir. Bu məhdudiyyətlət uzun illərdir ki, Vaşinqtonun Tehranla münasibətlərində əsas alət kimi çıxış edir və əsasən İranın nüvə proqramı ilə əlaqələndirilir. Bununla belə, İranla bağlı sanksiyalar yalnız nüvə məsələsi ilə məhdudlaşmır; insan hüquqları, regional siyasət, hərbi fəaliyyətlər və digər sahələr də bu sanksiyaların əhatə dairəsinə daxildir. Son illərdə İranla ABŞ arasında aparılan dolayı danışıqlar, xüsusilə nüvə proqramı üzrə bir neçə görüşün keçirilməsi, bu məsələyə olan beynəlxalq marağın və gərginliyin davam etdiyini göstərir. Bu kontekstdə sanksiyaların mahiyyəti, məqsədləri və perspektivləri müasir beynəlxalq siyasətin aktual tədqiqat mövzularından biri olaraq qalır.
Mövzu haqqında Crossmedia.az-a Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan danışıb. Şərhçinin sözlərinə görə ABŞ-nin İrana qarşı sanksiyaları təzyiq vasitəsidir və tərəflər arasında yekun sənədlər imzalanmadığı müddətcə bu sanksiyalar davam edəcək: "Hazırkı mərhələdə artıq birbaşa olmayan dörd görüş keçirilib. Bu görüşlər İranın nüvə proqramına dair məsələləri əhatə edib. ABŞ-nin əsas məqsədi İranın nüvə silahı əldə etməsinin qarşısını almaqdır. İranın əsas hədəfi isə nüvə proqramı ilə bağlı ABŞ və digər ölkələrin tətbiq etdiyi sanksiyaların aradan qaldırılmasıdır. Qeyd edilməlidir ki, ABŞ-nin İrana qarşı tətbiq etdiyi bütün sanksiyalar yalnız nüvə proqramı ilə əlaqəli deyil. Məsələn, İranın hərbi-sənaye kompleksi, insan hüquqlarının pozulması, sərbəst toplaşma azadlığının məhdudlaşdırılması və digər sahələrlə bağlı da sanksiyalar mövcuddur".
O bildirib ki, nüvə məsələsi üzrə danışıqlar yekunlaşsa və müvafiq razılaşma imzalansa belə, İrana qarşı müxtəlif sahələrdə sanksiyaların tətbiqi ehtimalı qalmaqdadır və bu sanksiyaların davam etdirilməsi mümkündür.
Ləman Həsənova
11:14 14.05.2025
Oxunuş sayı: 1086
