AQTİ laboratoriyalar üçün növbəti səriştəlilik sınağını elan edir
Azərbaycan Qida Təhlükəsizliyi İnstitutu (AQTİ) ölkədə fəaliyyət göstərən laboratoriyalar üçün növbəti səriştəlilik sınağını təşkil edir. İnstitutun İctimaiyyətlə əlaqələr şöbəsindən verilən məlumata görə, səriştəlilik sınağı ət və ət məhsullarında (kolbasa) nitrit, nəmlik, nişasta parametrlərinin kəmiyyətcə təyini üzrə keçiriləcək. Həmin sınaq laboratoriyaların analiz nəticələrinin düzgünlüyünü və etibarlılığını yoxlamaq üçün yaradılan növbəti fürsətdir.
Kolbasa məhsulunda nitrit, nəmlik və nişasta analizləri məhsulun təhlükəsizliyi və keyfiyyətinin qiymətləndirilməsi baxımından mühüm rol oynayır. Belə səriştəlilik sınaqları laboratoriya mütəxəssislərinin peşəkar inkişafına da mühüm töhfə verir
Səriştəlilik sınaqları ISO 17043:2023 “Uyğunluğun qiymətləndirilməsi – Səriştəlilik sınaqlarına ümumi tələblər” beynəlxalq standartı əsasında təşkil olunur və qiymətləndirmələr də bu standartın tələblərinə uyğun şəkildə aparılır.
Müraciət üçün son tarix mayın 31-dir.
Laboratoriyalar iştirak üçün “Müraciət forması”nı dolduraraq [email protected] elektron ünvanına göndərməlidirlər. Sınaq nəticələri tamamlandıqdan sonra isə “Nəticələrin qeydiyyat forması” eyni ünvan vasitəsilə təqdim olunmalıdır.
Sınaq proqramı və iştirakla bağlı sənədlərlə AQTİ-nin rəsmi internet səhifəsində (www.afsi.gov.az) “Səriştəlilik sınaqları” bölməsində tanış olmaq mümkündür. Həmçinin Azərbaycan Akkreditasiya Mərkəzinin rəsmi internet səhifəsində (https://accreditation.gov.az/az/seristelilik-sinaqlari-teminatcilari-barede-melumat) səriştəlilik planları ilə tanış olma imkanı yaradılıb.
Sınaq nəticələri İnstitutun saytında individual laboratoriya nömrələri ilə açıqlanacaq və nəticələrin konfidensiallığı tam şəkildə qorunacaq.
Azərbaycan Qida Təhlükəsizliyi İnstitutu bütün müvafiq laboratoriyaları səriştəlilik sınaqlarında iştirak etməyə dəvət edir.
08:46 03.05.2025
Oxunuş sayı: 897
