İstanbul zəlzələləri təkrar olunur: 258 illik geri sayım bitdi?
İstanbulun Silivri şəhərində baş verən ardıcıl zəlzələlər böyük təşvişə səbəb oldu. Əvvəlcə 3.9, ardınca isə 6.2 bal gücündə iki yeraltı təkan qeydə alındı. Zəlzələlərdən sonra bölgədə çoxsaylı yeraltı təkanlar baş verib. Hadisədən sonra mütəxəssislərin verdikləri açıqlamalar isə diqqətçəkən məqamları ortaya qoyub.
Crossmedia.az xəbər verir ki, bu barədə “CNN TÜRK” məlumat yayıb.
Yaponiyalı mütəxəssis Yoşinori Morivaki İstanbulda baş verən tarixi zəlzələlərə toxunaraq ciddi xəbərdarlıqlar edib. O, İstanbulda 447, 557, 1509 və 1766-cı illərdə böyük dağıntılara səbəb olan zəlzələlərin baş verdiyini vurğulayaraq bu hadisələrin müəyyən dövrlərlə təkrarlanmasının təsadüfi olmadığını bildirdi.
Mütəxəssisin sözlərinə görə, son böyük zəlzələnin üzərindən 258 il keçib və bu müddət yeni bir dağıdıcı zəlzələnin xəbərçisi ola bilər:
“Tarix təkrar olunur. İstanbulda yenidən böyük bir zəlzələ ehtimalı artıb. Xüsusilə Marmara bölgəsində enerji yığımı davam edir. Bu da böyük bir qırılma ilə nəticələnə bilər”.
O, xüsusilə torpağı yumşaq olan bölgələr — Avcılar, Küçükçekmece, Ataköy və Böyükçekmece kimi ərazilərin yüksək risk altında olduğunu və təcili şəkildə şəhərsalma yenidənqurma layihələrinin həyata keçirilməli olduğunu vurğulayıb.
Mütəxəssis həmçinin əlavə edib ki, əgər Marmara dənizi boyunca uzanan Şimal Anadolu Fayı tamamilə qırılsa, bu zaman zəlzələnin gücü 7.9 bala qədər çata bilər.
Onun xəbərdarlıqları bir daha göstərir ki, İstanbul üçün zaman getdikcə daralır. Mütəxəssislər isə vətəndaşları hazırlıqlı olmağa və zəlzələyə davamlı binalarda yaşamağa çağırır.
Nigar Rəhimova
20:53 24.04.2025
Oxunuş sayı: 1154
