Qazaxıstan və Əfqanıstan strateji dəmir yolu layihəsində razılığa gəldi
Qazaxıstan və Əfqanıstan arasında Turgundi–Herat dəmir yolu xəttinin inşası ilə bağlı razılıq əldə olunub. Bu razılaşma Qazaxıstan nümayəndə heyətinin Əfqanıstana rəsmi səfəri zamanı əldə edilib. Tərəflər Turgundi–Herat–Kandahar–Spin-Boldak marşrutu üzrə yeni dəmir yolu xəttinin inşasına dair maraqlarını təsdiqləyən protokolu imzalayıblar. Yeni layihə regionda nəqliyyat və logistika baxımından mühüm rol oynayacaq.
Crossmedia.az xarici mediaya istinadən bildirir ki, bu dəmir yolu xətti Türkmənistanın qərb sərhədindən başlayaraq Əfqanıstan ərazisindən keçməklə Pakistanın Spin-Boldak sərhəd məntəqəsinə qədər uzanacaq. Bu isə Orta Asiyanı Cənubi Asiya bazarlarına birbaşa birləşdirəcək mühüm bir nəqliyyat dəhlizinin formalaşmasına şərait yaradacaq.
Layihənin icrası üçün üç ölkənin – Qazaxıstan, Əfqanıstan və Türkmənistan – dəmir yolları qurumları arasında birgə müəssisənin yaradılması nəzərdə tutulur. Bu əməkdaşlıq formatı həm texniki, həm maliyyə, həm də idarəetmə baxımından layihənin davamlı inkişafını təmin etməyə hesablanıb.
Qazaxıstan tərəfi bu dəmir yolu layihəsini Mərkəzi Asiya ilə Cənubi Asiya arasında logistik əlaqələrin gücləndirilməsi və Hind okeanı limanlarına çıxış əldə etmək baxımından strateji əhəmiyyətli hesab edir. Layihənin reallaşması həm də regionda iqtisadi inteqrasiyanın və ticarət dövriyyəsinin artmasına töhfə verəcək.
Fatimə Nəbiyeva
20:40 24.04.2025
Oxunuş sayı: 11815
