İran yeraltı nüvə obyektlərini möhkəmləndirir – ABŞ ilə danışıqlar fonunda gərginlik artır
Reuters-in məlumatına görə, ABŞ ilə aparılan danışıqlar davam etdiyi bir vaxtda İran, əsas nüvə obyektlərini yerləşdirdiyi bölgələrdə təhlükəsizlik tədbirlərini gücləndirir. Rəsmi mənbələr bildirir ki, ABŞ və İsrailin mümkün hücumlarına qarşı ehtiyat tədbiri kimi İran yerin dərin qatlarında yerləşən və əsas nüvə kompleksi ilə əlaqəli iki tunel sistemini möhkəmləndirməyə başlayıb.
Crossmedia.az xarici mətbuata istinadən xənər verir ki, tunellərin ətrafında geniş təhlükəsizlik perimetri yaradılıb. Beynəlxalq müşahidəçilər bu addımı İranın nüvə fəaliyyətlərinin hərbi məqsədlərlə bağlı ola biləcəyi yönündə narahatlıq doğuran bir hərəkət kimi qiymətləndirirlər.
Beynəlxalq Atom Enerjisi Agentliyinin (BAEA) baş direktoru Rafael Qrossi məsələ ilə bağlı açıqlamasında bildirib ki, İranın tikdiyi bu tunel komplekslərinin "şübhəli məqsədlər" üçün istifadə edilmə ehtimalı istisna edilmir. Onun sözlərinə görə, Agentlik bu məsələni dəfələrlə qaldırıb, lakin Tehran mövqeyində israrlıdır.
“Biz bu obyektlərlə bağlı aydınlıq tələb edirik. İran isə deyir: 'Bu, sizin işiniz deyil',” – deyə Qrossi qeyd edib.
Qeyd edək ki, İranın nüvə fəaliyyəti uzun illərdir beynəlxalq ictimaiyyətin diqqət mərkəzindədir. Tehran nüvə proqramının sülhməramlı məqsədlərə xidmət etdiyini bildirsə də, Qərb ölkələri, xüsusilə ABŞ və İsrail, bu iddialara şübhə ilə yanaşır. Son proseslər bölgədə yeni gərginlik dalğasına səbəb ola bilər.
19:23 24.04.2025
Oxunuş sayı: 934
