Cənubi Koreyanın keçmiş prezidenti Mun rüşvət almaqda ittiham edilir
Cənubi Koreyanın sabiq lideri Mun Çje İn vəzifədə olduğu dövrdə kürəkəninə qurulan iş vasitəsilə rüşvət almaqda ittiham olunur. Bu ittiham onu, səlahiyyət müddəti başa çatdıqdan sonra hüquqi araşdırmalara məruz qalan Cənubi Koreya prezidentləri sırasına əlavə edir.
Crossmedia.az xarici mediaya istinadən bildirir ki, prokurorluğun iddialarına görə, Mun 2018-2020-ci illər arasında keçmiş kürəkənini maliyyə baxımından dəstəkləyən Thai Eastar Jet şirkətinin qurucusu Li Sanq-jikdən ümumilikdə 217 milyon von dəyərində rüşvət alıb. Bu dəstəyə maaş, yaşayış yeri və digər xərclər də daxil olub.
Li Sanq-jik, eyni zamanda Munun keçmiş seçki kampaniyasında tərəfdaş olub və hazırda həm rüşvətxorluq, həm də etimaddan sui-istifadə ilə bağlı ittihamlarla üzləşir. Məlumata əsasən, Munun kürəkəni aviasiya sahəsində təcrübəsi olmasa da və uzaqdan işlədiyini bildirsə də, Taylandda yerləşən aviaşirkətdə rəhbər vəzifəyə təyin olunub.
Sonradan Li dövlət vəsaiti ilə maliyyələşdirilən bir qurumun rəhbəri vəzifəsinə gətirilib, həmçinin Munun partiyası tərəfindən parlament seçkilərinə namizəd kimi irəli sürülüb. Lakin prokurorlar hələlik Munun bu təyinatlara birbaşa təsirinə dair konkret sübut aşkar etmədiklərini bildiriblər.
İddianamə, iyunun 3-də keçiriləcək prezident seçkiləri ərəfəsində, hazırkı prezident Yun Suk Yeolun hərbi vəziyyət elan etmək cəhdindən sonra vəzifəsindən uzaqlaşdırılması fonunda irəli sürülüb. Munun Demokrat Partiyasından olan tərəfdarları bu ittihamların siyasi motivli olduğunu irəli sürür və Yun tərəfdarı prokurorları keçmiş liberal liderin imicini zədələməkdə ittiham edirlər.
2017-2022-ci illərdə prezident olan Mun, Şimali Koreya ilə münasibətlərin yaxşılaşdırılması üçün Kim Çen In ilə üç dəfə görüşmüş və ABŞ prezidenti Donald Trampın da iştirak etdiyi nüvə diplomatiyasına zəmin yaratmışdı. Onun tərəfdarları bu təşəbbüslərin regionda silahlı münaqişənin qarşısını aldığını söyləsə də, tənqidçilər onu sadəlövh yanaşmada və Şimali Koreyaya nüvə proqramını inkişaf etdirmək üçün zaman qazandırmaqda günahlandırırlar.
Zəhra Ağayeva
17:19 24.04.2025
Oxunuş sayı: 9970
