Papa Fransiskdən Roma uşaq həbsxanasına 200 min avro ianə
Papa Fransisk ölümündən öncə şəxsi hesabından Romadakı Casal del Marmo uşaq həbsxanasına 200 min avro ianə edib.
Roma üzrə xeyriyyəçilik və həbsxana xidmətlərindən məsul Monsenyor Benoni “Don Ben” Ambarusun sözlərinə görə, bu vəsait həbsxanada fəaliyyət göstərən makaron fabrikinə borcların azaldılması məqsədilə ayrılıb.
Crossmedia.az xarici mediaya istinadən bildirir ki, sözügedən müəssisə əsasən 18 yaşına çatmamış gənc məhkum və ya sınaq müddətində olan gənclərin reabilitasiyası və peşə təhsili ilə məşğuldur. Papanın məqsədi bu təşəbbüsə dəstək verməklə həm məhsulun qiymətini ucuzlaşdırmaq, həm də daha çox gəncə iş imkanı yaratmaq olub.
Monsenyor Ambarus bildirib ki, Papanın son günlərində belə, məhkumlara göstərdiyi diqqət və qayğı azalmayıb:
“Dedim ki, fabrikin borcu çoxdur. O isə ‘Demək olar ki, bütün pullarım tükənib, amma bir qədər qalıb’ dedi və 200 min avro göndərdi”.
O, həmçinin Papa Fransiskin müqəddəs cümə axşamı Regina Coeli həbsxanasını ziyarət etdiyini və məhkumların onu “ata fiquru” kimi gördüklərini söyləyib:
“O, çox yorğun idi, amma son nəfəsinə qədər məhbuslara ümid verdi. Onun varlığı ilə səssiz şəkildə qışqırırdı ki, sizi görürəm, sizi anlayıram”.
Monsenyor Ambarus əlavə edib ki, bəzi məhkumlar Papa üçün “özlərini yetim hiss etdiklərini” bildirərək onun məzarı üzərinə gül qoymağı xahiş ediblər. O, Papanın dəfn mərasimində bu gənclərin də iştirak edə bilməsi üçün çalışdığını qeyd edib.
Ambarus eyni zamanda Papa Fransiskin məhkumlara əfv və mərhəmət çağırışlarının hüquq sistemində yetərincə əks olunmamasından da narazılığını ifadə edib.
Zəhra Ağayeva
17:12 24.04.2025
Oxunuş sayı: 10316
