Ekspert: "Vaşinqton İranla bağlı sanksiya siyasətindən əl çəkməyəcək"
ABŞ ilə İran arasında davam edən gərgin münasibətlər fonunda sanksiyalar mühüm siyasi və diplomatik vasitə kimi çıxış edir. Xüsusilə İranın nüvə proqramı ilə bağlı artan narahatlıqlar, Vaşinqtonun bu məsələdə sərt xətt yürütməkdə davam etdiyini göstərir. ABŞ-nin “İrana maksimum təzyiq” strategiyası çərçivəsində atdığı addımlar, tərəflər arasında kompromis imkanlarını məhdudlaşdırmaqla yanaşı, regiondakı ümumi təhlükəsizlik balansına da təsir göstərir. Tehranla Vaşinqton arasında davam edən gərginliyin perspektivi barədə siyasi şərhçi, Orta Doğu Araşdırmalar Mərkəzinin sədri Sədrəddin Soltan Crossmedia.az-a danışıb. Onun sözlərinə görə, ABŞ-nin son sanksiyaları bir daha təsdiqləyir ki, Vaşinqton İranla bağlı sanksiya siyasətindən və bu istiqamətdəki sərt tədbirlərdən imtina etmək niyyətində deyil: "İranın nüvə proqramı beynəlxalq gündəmdə əsas müzakirə mövzularından biri olaraq qalmaqda davam edir. Digər mühüm məsələlər üzrə yekun sənədlərin qəbul olunmaması və tərəflər arasında hər hansı razılığın əldə edilməməsi fonunda sanksiyaların tətbiqi prosesi fasiləsiz şəkildə davam etdirilir. Danışıqlar aparıldığı bir şəraitdə İran hakimiyyətinin müxtəlif yollarla əvvəlki sanksiyalardan yayınmağa çalışması ABŞ-nin, xüsusilə də Prezident Donald Trampın başladığı və hələ də qüvvədə olan “İrana maksimum təzyiq” siyasətinə tamamilə ziddir. Vaşinqton bu cür davranışları təzyiq siyasətinə qarşı bir təhdid kimi qiymətləndirir və buna uyğun sərt addımlar atmaqda israrlıdır".
Müsahibimizin sözlərinə görə, Tehran rejiminə qarşı tətbiq olunan bu sanksiyalar yalnız müəyyən konkret nəticələr əldə olunduğu, xüsusilə də İranın nüvə proqramının hərbi məqsədlər daşımadığına dair ABŞ-nin tam əminliyi formalaşdığı təqdirdə yumşaldıla və ya aradan qaldırıla bilər: "Lakin hazırkı siyasi və diplomatik mənzərədə İranın bu istiqamətdə real və adekvat addımlar atacağı ehtimalı olduqca zəif görünür. Bunun əsas səbəbi isə İranın ABŞ-yə qarşı sanksiyalar vasitəsilə təsir və təzyiq mexanizmlərinin son dərəcə məhdud imkanlara malik olmasıdır. Bu da Vaşinqtonun üstün mövqeyini qoruyub saxlamasına şərait yaradır".
Ləman Həsənova
11:57 24.04.2025
Oxunuş sayı: 1219
