Trampdan sərt ultimatum: “İran nüvə xülyasından əl çəkməsə, cavabını alacaq”
ABŞ prezidenti Donald Tramp İranın nüvə proqramı və Rusiya-Ukrayna müharibəsi ilə bağlı növbəti sərt açıqlamalarla çıxış edib.
Crossmedia.az xarici KİV-ə
istinadən xəbər verir ki, o, İranın nüvə silahına sahib olmamalı olduğunu vurğulayaraq, bu istiqamətdə
atılan addımların qarşısında sərt reaksiya ilə üzləşəcəklərini bəyan edib.
Tramp
bildirib ki, İranın rifahlı və güclü ölkəyə çevrilməsini istəsə də, bu ölkənin
nüvə silahına sahib olması qəbuledilməzdir:
"Mən
İranın zəngin və böyük ölkə olmasını istəyirəm, amma çox sadə bir şey var –
onların nüvə silahı ola bilməz. İran bu xülyasından əl çəkməlidir, əks halda sərt
cavab verəcəyik", – deyə Tramp xəbərdarlıq edib.
Həmçinin prezident əlavə
edib ki, İran rəhbərliyi ABŞ ilə razılaşma əldə etmək istədiyini göstərsə də,
bu prosesin necə aparılacağını bilmirlər:
"Əsl məsələ budur: İran heç vaxt nüvə silahına sahib ola bilməz. Onlar bu ölkədəki köhnə sövdələşmələrə öyrəşiblər, amma indi vəziyyət fərqlidir".
Tramp Rusiya-Ukrayna müharibəsinə də münasibət bildirib. Onun sözlərinə
görə, bu münaqişənin yaranmasında ABŞ prezidenti Co Baydenin və Ukrayna lideri
Volodimir Zelenskinin məsuliyyəti var:
"Əgər Bayden bacarıqlı olsaydı, bu müharibə heç vaxt başlamazdı. Müharibə başlayanda bilməlisən ki, onu qazana bilərsən. Səndən 20 dəfə böyük ölkə ilə savaşmaq və sonra başqa ölkələrdən raket gözləmək ağılsızlıqdır".
Aybəniz Səfərova
21:39 14.04.2025
Oxunuş sayı: 1926
