Hindistanda yük maşını zəvvarların üzərinə aşıb: 15 nəfər ölüb
Hindistanın Madhya-Pradeş ştatında yük maşınının zəvvarların üzərinə aşması nəticəsində 15 nəfər həlak olub, 25-dən çox insan yaralanıb.
Crossmedia.az xəbər verir ki, “NDTV” yerli polisə istinadən bu barədə məlumat yayıb.
Hadisə gecə saat 01:40 radələrində Qvalior şəhərindəki Şitla Mata məbədinə aparan Çinor–Nayaqaon yolunda baş verib. Qədim məbədə piyada gedən zəvvarların üzərinə düyü daşıyan ağır yük maşını aşıb. İlkin məlumata görə, sürücü enişdə idarəetməni itirib, yük maşını bir neçə maneəni dağıdaraq insanların üzərinə düşüb.
Polisin məlumatına görə, maşının təkərləri və yük kuzovu altında 50-dən çox insan qalıb. Hadisə şahidlərindən biri jurnalistlərə yük maşınının əyləclərinin sıradan çıxdığını deyib.
Qəza ilə əlaqədar yük maşınının sürücüsü və sahibi saxlanılıb. Məlum olub ki, karvanla hərəkət edən iki yük maşınının sürücüləri yolu tanımayıb və Google Maps naviqasiya sistemindən istifadə ediblər. Birinci maşın yamacda dayanıb, ikinci yük maşını isə aşağıya doğru hərəkət edərək idarəetmədən çıxıb. Yoxlama zamanı avtomobilin texniki baxışdan keçdiyi və lazımi icazələrinin olduğu müəyyən edilib.
Həlak olanların yaxınları xəstəxananın morqu qarşısında etiraz aksiyası keçiriblər. Onlar yerli administrasiyanı tibbi yardımın gecikdirilməsində və məlumatların gizlədilməsində ittiham ediblər.
Hindistanın Baş naziri Narendra Modi həlak olanların ailələrinə Baş nazirin Milli Yardım Fondundan 200 min rupi (təxminən 2,1 min dollar), yaralılara isə 50 min rupi (təxminən 526 dollar) ödəniləcəyini açıqlayıb.
Ştatın baş naziri Mohan Yadav əlavə kompensasiya ayrılması barədə göstəriş verib. Buna əsasən, həlak olanların ailələrinə 400 min rupi (təxminən 4,2 min dollar), ağır yaralılara 200 min rupi, digər zərərçəkənlərə isə 50 min rupi ödəniləcək.
Hindistan prezidenti Draupadi Murmu da hadisə ilə bağlı “X” sosial şəbəkəsində başsağlığı verib.
12:09 18.10.2026
Oxunuş sayı: 50
