Xarici xəbərlər

ABŞ-dən Rusiya ilə bağlı yeni addım – 60 gün vaxt

ABŞ Prezidenti Donald Trampa Rusiyaya qarşı bəzi sanksiya və gömrük rüsumlarının ləğvinin iqtisadi nəticələrini qiymətləndirmək üçün 60 günədək vaxt lazım olacaq. ABŞ dövlət katibi Marko Rubio bu barədə açıqlama verib.

Crossmedia.az xəbər verir ki, Reuters agentliyi bu barədə məlumat yayıb.

Cümə günü Tramp “Graham qanunu” çərçivəsində əsas sanksiya və gömrük rüsumlarının ləğvini nəzərdə tutan sərəncam imzalayıb. “Cəhənnəm sanksiyaları” adlandırılan qanun Rusiya mallarına rüsumların tətbiqini, eləcə də Rusiyadan neft və qaz alan ölkələrə qarşı məhdudiyyətləri nəzərdə tuturdu. Bu tədbirlərin gələn həftədən qüvvəyə minməsi planlaşdırılırdı. Lakin imzalanan sərəncamda rüsumların ləğvinin nə qədər davam edəcəyi göstərilməyib.

Rubionun sözlərinə görə, Tramp 60 günlük müddətdən istifadə edərək sanksiya və rüsumların dünya iqtisadiyyatına, o cümlədən ABŞ iqtisadiyyatına mümkün təsirlərini təhlil etmək istəyir.

Dövlət katibi ABŞ ilə Rusiya arasında dizel yanacağının dünya bazarına tədarükünün artırılmasına dair razılaşmanı da müdafiə edib. Onun sözlərinə görə, bu addım İranla müharibə və enerji təchizatında yaranan fasilələr fonunda bahalaşan yanacağın qiymətlərini yumşaltmağa yönəlib.

Rubio bildirib ki, sanksiyaların ləğvi və yanacaq tədarükünə dair razılaşma Yaxın Şərqdə və Ukraynada münaqişələrin həllinin mürəkkəbliyini, eləcə də bu münaqişələrin qlobal enerji təchizatına təsirlərini əks etdirir. Daha əvvəl bir qrup ABŞ konqresmeni Vaşinqtonla Moskva arasında dizel yanacağı razılaşmasının qarşısını almaq məqsədilə qanun layihəsi təqdim edib.