Disney-dən heyvanların xilası üçün 120 milyon dollar
Dünyanın ən məşhur əyləncə şirkətlərindən biri olan “Disney” 25 ildir nəsli kəsilmək təhlükəsi ilə üzləşən heyvanların qorunması və onların təbii yaşayış mühitinin bərpası istiqamətində fəaliyyət göstərir.
Crossmedia.az xəbər verir ki, şirkətin “Disney’s Animal Kingdom” parkı dünyanın ən böyük baytarlıq mərkəzlərindən birinə malik olmaqla müxtəlif heyvan növlərinin mühafizəsində mühüm rol oynayır.
Məlumata görə, parkın Heyvanların Qidalanması Mərkəzinin əməkdaşları heyvanlar üçün 1500 fərqli qidalanma proqramına nəzarət edir. Hər gün heyvanlara təxminən 4,5 ton qida verilir.
Bununla yanaşı, “Disney Conservation Fund” vəhşi təbiətin qorunması, nəsli kəsilməkdə olan heyvanların xilası və onların yaşayış mühitinin bərpası üçün ümumilikdə 120 milyon dollar vəsait ayırıb.
Şirkətin mütəxəssisləri heyvanların təbii şəraitə uyğun yaşaması üçün xüsusi ekosistemlər də yaradırlar. Belə layihələrdən biri Şanxay Disney kurortunda quş populyasiyalarının qorunması məqsədilə salınmış “Wishing Star Lake” gölüdür.
“Disney”in digər ərazilərində isə nəsli kəsilmək təhlükəsi ilə üzləşən kəpənəklərin, o cümlədən monarx kəpənəklərinin qorunması üçün tozlandırıcı bitkilərdən ibarət xüsusi bağlar yaradılır.
Şirkətin təbiəti mühafizə mütəxəssisləri Yer Günü münasibətilə insanları da bu təşəbbüsə qoşulmağa çağırıblar.
Mütəxəssislər bildirirlər ki, insanların yaşadıqları ərazilərdə arıları, kəpənəkləri və digər tozlandırıcı canlıları cəlb edən bitkilər əkməsi yerli ekosistemlərin və biomüxtəlifliyin qorunmasına mühüm töhfə verə bilər.
03:25 18.10.2026
Oxunuş sayı: 57
