Şimali Koreya tarixindəki ən böyük hərbi gəmini inşa edir: Peyk görüntüləri ortaya çıxdı
Yeni peyk görüntüləri, Şimali Koreyanın indiyədək hazırladığı ən böyük hərbi gəminin ölçülərini üzə çıxarıb. Analitiklər, gəminin Rusiyadan raket texnologiyası dəstəyi almış ola biləcəyini ehtimal edirlər.
6 aprel tarixində “Maxar Technologies” və “Planet Labs”tərəfindən çəkilən peyk görüntülərində, Pxenyanın təxminən 60 kilometr cənub-qərbində, Nampo gəmiqayırma zavodunda suda inşası davam edən yeni döyüş gəmisinin görüntüsü yer alıb.
Crossmedia.az xəbər verir ki, “CNN International” məlumatına görə, gəmi qurudan və dənizdən hədəflərə qarşı istifadə olunmaq üçün hündür buraxılış qurğularında raketlər daşıya bilən idarəolunan raket freqatı (FFG) kimi dizayn edilib. Gəmidə silah sistemləri və daxili avadanlıqların quraşdırılmasının davam etdiyi bildirilir.
Strateji və Beynəlxalq Araşdırmalar Mərkəzindən Cozef Bermudez Jr. və Cenifer Jun təhlilinə əsasən, gəminin təqribən 140 metr uzunluğunda olduğu və bu ölçüsü ilə Şimali Koreyada istehsal edilmiş ən böyük döyüş gəmisi olduğu qeyd olunur.
Müqayisə üçün, ABŞ Hərbi Dəniz Qüvvələrinin “Arleigh Burke” sinifli esminesləri 153 metr, inşası davam edən “Constellation” sinifli freqatları isə 151 metr uzunluğundadır.
Lider Kim Çen In rejimi, ordunu sürətlə modernləşdirmək istiqamətində yeni silahlar hazırlayır və ABŞ-nin demək olar ki, istənilən nöqtəsinə çata biləcək qitələrarası ballistik raketləri sınaqdan keçirir.
Bu fəaliyyətlərə baxmayaraq, Şimali Koreya BMT tərəfindən tətbiq olunan ciddi sanksiyalara məruz qalır. Lakin ekspertlər, Rusiya ilə Ukrayna müharibəsindən sonra artan əlaqələrin bu sanksiyaların təsirini azaltmaqda rol oynaya biləcəyini bildirirlər.
Cənubi Koreyalı təqaüddə olan admiral Kim Duk-ki, Moskvanın freqatın raket sistemləri üçün texnologiya təmin etmiş ola biləcəyini ehtimal etdiyini söyləyib.
KCTV tərəfindən yayımlanan görüntülərdə, gəmidə müxtəlif raketlərin buraxılması üçün istifadə oluna biləcək dikey buraxılış hüceyrələri də daxil olmaqla, müasir donanmalara xas silah sistemlərinin olduğu görünür.
Analitiklər əlavə edirlər ki, gəmi, əvvəlki Şimali Koreya texnologiyalarından daha sürətli və dəqiq hədəf izləyə bilən mərhələli radar sistemləri ilə təchiz edilə bilər.
Mədinə Cəlilova
20:07 14.04.2025
Oxunuş sayı: 10439
