ABŞ tarixinin ən böyük deportasiya əməliyyatı: Trampın hədəfi 1 milyon nəfər
ABŞ Prezidenti Donald Tramp, qeyri-qanuni miqrantlara qarşı sərt siyasəti ilə yenidən gündəmdədir. Bu il ərzində 1 milyon miqrantın ölkədən çıxarılması planlaşdırılır.
Crossmedia.az xəbər verir ki, “The Washington Post”qəzetinin məlumatına görə, Tramp administrasiyası ABŞ-dəki qeyri-qanuni miqrantların deportasiyası üçün genişmiqyaslı bir əməliyyata hazırlaşır. Bu plan, ABŞ tarixindəki ən böyük deportasiya əməliyyatlarından biri ola bilər.
Tramp, əvvəlki prezident Barak Obamanın bir il ərzində 400 min miqrantı deportasiya edərək əldə etdiyi rekordu keçmək niyyətindədir. Əməliyyatla bağlı müvafiq qurumların hər gün toplantılar keçirdiyi və hazırlıqların davam etdiyi bildirilir.
Trampın seçki kampaniyasında verdiyi vədlərdən biri miqrant sayını azaltmaq olmuşdu. Bu siyasət, onun seçici bazasında ciddi dəstək qazanmışdı. İndi isə bu vəd konkret tədbirlər planına çevrilib.
İlkin olaraq, deportasiya qərarı olduğu halda ölkələri tərəfindən geri qəbul edilməyən 1 milyon 400 min nəfərə üstünlük veriləcək. Bu məqsədlə ABŞ, bu şəxsləri qəbul edə biləcək 30 ölkə ilə danışıqlara başlayıb.
Meksika, Kosta-Rika və Panama kimi ölkələrə artıq vətəndaşları olmayan bəzi miqrantların göndərildiyi bildirilib. Həmçinin ABŞ-də qalmağa davam edən qeyri-qanuni miqrantlara gündəlik 998 dollar cərimə tətbiq olunması planlaşdırılır.
Tramp administrasiyası, bəzi miqrantları birbaşa üçüncü ölkələrə göndərmək modelini də işə salmağı hədəfləyir.
Mədinə Cəlilova
19:05 14.04.2025
Oxunuş sayı: 10597
