“Qiyamət kimi” zəlzələ xəbərdarlığı: İran yüksək risk altındadır
İranlı seysmoloq və professor Fəriborz Natıki, paytaxt Tehran başda olmaqla ölkənin bir çox bölgəsində dağıdıcı zəlzələ riski olduğunu bildirib.
Crossmedia.az xəbər verir ki, Tehrandakı Beynəlxalq Seysmologiya və Zəlzələ Mühəndisliyi İnstitutunun əməkdaşı Natıki, İran Tələbə Xəbər Şəbəkəsinə (SNN) verdiyi müsahibədə qeyd edib ki, İranın demək olar bütün ərazisi və ona qonşu olan ölkələr yüksək riskli zəlzələ zonasındadır. Onun sözlərinə görə, “İran, dünyada zəlzələlərin ən sıx baş verdiyi ölkələrdən biridir və son statistikaya əsasən, həm intensivlik, həm də tezlik baxımından üçüncü yerdədir.”
Natıki, Tehranın aktiv fay xətti üzərində yerləşdiyini və burada təxmini 200 ildir böyük zəlzələ baş vermədiyini vurğulayaraq, “Hazırda ən böyük narahatlığımız Tehrandır. Bu şəhər üçün real mənada qiyamət kimi bir zəlzələ gözlənilir,” deyə xəbərdarlıq edib.
O, bölgədə aparılan araşdırmalara əsaslanaraq, hər 158-160 ildən bir təxminən 7 bal gücündə zəlzələlərin baş verdiyini bildirib və bu dövrün keçməsinin təhlükənin aradan qalxdığı anlamına gəlmədiyini, əksinə daha güclü bir zəlzələnin başvermə ehtimalının artdığını qeyd edib.
Yeni tikililərlə bağlı narahatlığını da ifadə edən Natıki, bir çox müasir binaların xaricən estetik görünsə də, struktur baxımından qənaət məqsədilə dayanıqsız inşa edildiyini və bu səbəblə əvvəlki tikililərə nisbətən daha riskli olduğunu bildirib. O, əldə etdiyi statistik məlumatların ictimaiyyətlə paylaşılmasının ciddi təşviş yaradacağını söyləyib.
Sonda Natıki, “Vəziyyət həqiqətən də yaxşı deyil. Mənim fikrimcə, nə atom bombası, nə müharibə, nə də başqa məsələlər əsas təhlükə deyil. İranı ən çox təhdid edən təhlükə Tehrandakı zəlzələdir. Əgər proqnozlaşdırılan zəlzələ baş verərsə, ölkə idarəçiliyi çökər, çünki İran hərtərəfli şəkildə Tehrana bağlıdır. Bu halda, milli fəlakətlə üzləşə bilərik,” deyə xəbərdarlıq edib.
Mədinə Cəlilova
18:45 14.04.2025
Oxunuş sayı: 1386
