İranda türk dilinə rəsmi status tələbi ilə kampaniya başladılıb
İranda türk dilinə rəsmi dövlət dili statusunun verilməsi tələbi ilə kampaniya başladılıb.
Crossmedia.az xəbər verir ki, bu barədə mədəni fəallar məlumat yayıblar.
Məlumata görə, bu tələblə başladılan imza kampaniyasına minlərlə şəxs qoşulub.
"Dəyərli dost, dil ədalətini gerçəkləşdirək kampaniyası türk dilinin İranın rəsmi dillərindən biri kimi tanınması üçün fəaliyyət göstərir. Buna görə də sizdən xahiş edirik ki, bu petisiyanı imzalamaqla qanuni və ədalətli tələbimizi dəstəkləyəsiniz. Sizin imzanız dil ayrı-seçkiliyinin aradan qaldırılması və mədəni haqlarımızın əldə olunması yolunda təsirli bir addımdır" – müraciətdə bildirilir.
Mövzu ilə bağlı Güney Azərbaycan üzrə araşdırmaçı jurnalist Elman Cəfərli Crossmedia.az-a açıqlamasında bildirib ki , bu cür kampaniyalar əsasən xaricdə yaşayan soydaşlarımız tərəfindən mütəmadi olaraq internet üzərindən təşkil olunur:
"Bu aksiyalar diqqəti İranda yaşayan türklərin ana dili hərəkatına, milli kimlik mübarizəsinə çəkir. Lakin biz o mərhələni indiyə qədər çoxdan keçməli idik. Çağdaş Güney Azərbaycan Milli Hərəkatının başlanma tarixi 90-cı illərin ortalarıdır. Milli hərəkat doktor Məhəmmədtağı Zehtabinin ideyası əsasında Bəzz qalasına yürüşlərlə başlanıb.Üstündən 30 il vaxt keçib, bu günə qədər Güneydə çoxlu təşkilatlar, dərnəklər yaranıb, fəaliyyət göstərib, çoxu dağılıb, yeniləri qurulub. Lakin biz hələ bircə dənə də olsa Azərbaycan dilində məktəb aça bilmədik. 150 minlik erməninin İranda ana dilində mətkəbləri, universitetləri, radio-televiziyaları, çap mediası var. Bizim isə yoxdur, KİV-lər isə cüzi saydadır. Halbuki İranda 40 milyona yaxın türk yaşayır. İran azərbaycanlıları dinc toplumdur, dövlətə bağlıdır. Bu isə İran rejimini arxayın salır, onlar soydaşlarımızın konstitusion hüquqlarını belə vermək istəmirlər. Üstəlik Qərbi Azərbaycanda gəlmə kürdlərin əli ilə təxribatlar törədir, bölgədə etnik münaqişəni alovlandırırlar. Rejimin Urmiyada, Sulduzda çıxdığı oyunlar soydaşlarımız üçün SOS siqnalı olmalıdır. İran rejiminə etibar yoxdur. İranlı kimliyindən vaz keçmək, türk kimliyinə sahib çıxmaq, ana dili hərəkatını gücləndirmək lazımdır.
Biz də bu işdə Güney Azərbaycan türklərinə dəstək verməliyik. Güney Azərbaycan adına fəaliyyət göstərən TV-lər özünü doğrultmur. Bakıda fəaliyyət göstərən bir TV var, həftədə 2 dəfə “Qatır Məmməd” filmini nümayiş etdirir. Bu adamlar anlamır ki, Azərbaycan Xalq Cümhuriyyətinə qarşı döyüşmüş quldur Məmmədə həsr olunmuş, Sovet dövründə çəkilmiş film Güney Azərbaycana hansı mesajı verə bilər? . Bu cür düşüncəsiz adamlara ayrılan maliyyə faydalı işlərə sərf edilməlidir. Yaxşı olar ki, aidyyati qurumlar, milli düşüncəli iş adamları İranda yayğın olan sosial şəbəkələr: telegram, instagram üzərindən təbliğat işinin qurulmasına diqqət ayırsınlar. Sözügedən şəbəkələrdə ana dilini təbliğ edən kanallar açılmalıdır. Biz bu halda Güney Azərbaycanda ana dilinin inkişafına nail ola bilərik.
Türkiyənin yumşaq gücü seriallar, bizimki musiqidir. Bu gün Azərbaycan müğənnilərinin oxuduğu mahnılar Güneydə, Şərqi Anadoluda, Mərkəzi Asiyada yayğındır. Biz bu faktordan istifadə etməliyik. Güneydə minlərlə aşıq var ki, onlar el-el, oba-oba gəzib Azərbaycan dilini yaşadırlar. Onları Quzeydə tanıtmalı, el şənliklərinə, rəsmi tədbirlərə dəvət etməliyik. Qoy, onlar kimsəsiz olduqlarını zənn etməsinlər”.
Zəhra Məmmədova
23:00 09.04.2025
Oxunuş sayı: 17630
