Yaxın aylarda İran, ABŞ və İsraillə qarşı-qarşıya qala bilər - AÇIQLAMA
İran Prezidenti Məsud Pezeşkian, ölkəsinin sülh və təhlükəsizlik istəyini vurğulasa da, nüvə texnologiyalarına dair qətiyyətli mövqeyini qoruyub saxladığını bildirib. O, müharibə istəmədiklərini, amma əldə etdikləri nailiyyətlərdən geri çəkilməyəcəklərini və təcavüzə qarşı güclü müqavimət göstərəcəklərini qeyd edib. Bu, İranın diplomatik həllərə açıq olduğunu, amma öz strateji maraqlarını qorumaq üçün təzyiqə boyun əyməyəcəyini göstərir. Bəs bu addım beynəlxalq nüvə danışıqlarına və İranın Qərb ölkələri ilə münasibətlərinə necə təsir edəcək?
Mövzu ilə bağlı Crossmedia.az-a açıqlama verən politoloq Elçin Xalidbəyli bildirib ki, Amerika Birləşmiş Ştatları və İran arasında gərginlik artır və hər iki tərəf bir-birini təhdid edərək, qarşılıqlı ittihamlar səsləndirir. Trump administrasiyası, vəziyyəti gərginləşdirərək, İranı müharibəyə çəkmək cəhdlərinə davam edir.
Onun sözlərinə görə, Amerika Birləşmiş Ştatları, İran qarşısında iki variant irəli sürüb və üçüncü bir seçimə yer yoxdur. Birinci variant, İranın ABŞ ilə anlaşaraq nüvə proqramını ləğv etməsini tələb edir. Trump administrasiyası, İranın bu şərtləri qəbul etməməsi halında, ikinci variant olaraq hərbi müdaxilə etməyə hazır olduqlarını bildirir. Trump, açıq şəkildə qeyd edib ki, İranla müharibə müzakirə edilir və artıq bu variant masada mövcuddur.
"Amerika Birləşmiş Ştatları, müharibəyə hazırlıq prosesini sona çatdırmaq üzrədir. İranın bölgədəki proksi qüvvələri tək-tək sıradan çıxarılır, son olaraq Husilərə qarşı hərbi addımlar atılıb."-deyə politoloq bildirib. Növbəti hədəf isə İraqda olan İran meyilli hərbi qruplaşmalardır. Son məlumatlara görə, bu qruplar artıq təslim olmağa və silahlarını yerə qoymağa razı olublar.
Elçin Xalidbəyli qeyd edib ki, bu vəziyyət, yaxın aylarda İranın birbaşa ABŞ və onun müttəfiqi olan İsraillə qarşı-qarşıya qalacağını göstərir. Belə bir qarşıdurma isə çox dağıdıcı nəticələrə səbəb ola bilər. Trump administrasiyası açıq şəkildə bildirir ki, əgər İran nüvə proqramından imtina etməsə, müharibə qaçılmaz olacaq. Bu addımların nəticəsi yalnız İran üçün deyil, həm də bölgə üçün böyük təhlükə yaradır.
Elçin Xalidbəyli sonda qeyd edib ki, ABŞ-ın təzyiqləri və hərbi hazırlıqları, İranı daha radikal mövqeyə sövq edə bilər. Bu, həm İran, həm də onun ətrafındakı regionlar üçün ciddi bir təhlükədir. Əgər müharibə baş verərsə, bu, böyük dağıntılara səbəb ola bilər və nəticələri olduqca ağır olacaq.
Fatimə Nəbiyeva
19:28 09.04.2025
Oxunuş sayı: 1525
