ABŞ və Çin arasında iqtisadi mühribə: Kim kimin "biləyini bükəcək?"
Çin ABŞ-nin ticarət siyasətinə qarşı sona qədər müqavimət göstərmək niyyətində olduğunu bəyan edib.
Bu barədə ölkənin Ticarət Nazirliyi müvafiq bəyanatla çıxış edib.
"ABŞ tərəfindən Çinə qarşı rüsumların artırılması ilə bağlı təhdid səhvdir. Ölkənin şantajçı mahiyyətini bir daha nümayiş etdirir. Əgər ABŞ öz mövqeyində israr edərsə, Çin sona qədər mübarizə aparacaq", - nazirliyin məlumatında bildirilib.
Qeyd edək ki, daha əvvəl ABŞ Prezidenti Donald Tramp Pekin ABŞ tariflərinə cavab tədbirlərindən imtina etməzsə, aprelin 9-dan Çin mallarına 50 faiz rüsum tətbiq edəcəyi ilə hədələyib.
Məlum olduğu kimi, son zamanlar Vaşinqtonla Pekin arasında münasibətlər gərginləşir. ABŞ- Çin dünya hegemonluğu uğrunda bir - birilərini zəiflətmək üçün bütün üsullardan istifadə edirlər. Bu baxımdan hər iki tərəf iqtisadi müharibəni ən optimal variant hesab edir və qarşılıqlı şəkildə rüsumlar tətbiq edirlər.
Davam edən iqtisadi müharibənin perspektivləri barədə Crossmedia.az-a danışan iqtisadi elmlər doktoru, professor, Milli Məclisin dörd çağırış deputatı Rüfət Quliyev Trampın geri addım atmayacağını bildirib: "Düşünülür ki, ABŞ üçün iqtisadi cəbhədən bəla Çinin iqtisadiyyatıdır. Trampın bu siyasəti ilin sonunadək davam etdirməsi gözlənilir. Əlbəttə, Avropa faktorunu da unutmamaq lazımdır. Trampın gələcək planları arasında Qrenlandiyanı zəbt etmək, Kanadanı 51-ci ştata çevirmək, Meksikanı iqtisadi formada diz üstə çökdürmək və.s var. Bu səbəbdən öz siyasətini yeritməyə davam edir. Lakin bu siyasətin ana xətti əhalinin, ölkənin rifahının daha üst səviyyəyə qalxmasıdır. Hazırda statistikaya əsasən dünya birjalarının ən azı 4.5%-dən 11%-ə qədər düşüş yaşadığını müşahidə edirik. Bunu bütün birjalarda görmək mümkündür" .
Professor söyləyib ki, savaş insanların rifahına təsir: "Maddi problemlər, o cümlədən inflyasiya artır. İndi Trampın siyasətinə müdaxilə etmək elə də asan deyil. Amma dünya Trampa qarşı iqtisadi cəhətdən ayağa qalxsa, o, siyasətini inqilabi yox, daha sakit formada həyata keçirə bilər".
Ləman Həsənova
13:41 08.04.2025
Oxunuş sayı: 11195
