Cəmiyyət
Müsadirə edilən əmlak necə istifadə edilir heç kim bilmir - hüquqşünas açıqladı
Böyük sərvət toplayan, bahalı avtomobillər alan, mülklər əldə edən, şirkətlər quran şəxslər bir gün hansısa cinayət əməlindən məsuliyyətə cəlb edilir. Belə hallarda təkcə onun azadlığı deyil, sahib olduğu milyonlarla manatlıq əmlakın da taleyi dəyişə bilər. Lüks villalar, bahalı avtomobillər, torpaq sahələri, bank hesabları və digər mülklər hüquqi araşdırmaların predmetinə çevrilir. Bəzi hallarda həmin əmlaklara həbs qoyulur, qanunla nəzərdə tutulan əsaslar olduqda isə müsadirə edilir. Bununla yanaşı, əmlak sahibinin ailə üzvlərinin, həyat yoldaşının və övladlarının mülkiyyət hüquqları da hüquqi baxımdan əhəmiyyət daşıyır.
Son illərdə varlı və vəzifəli şəxslərin cinayət məsuliyyətinə cəlb olunması fonunda müsadirə edilən əmlakların sonrakı taleyi, dövlətə keçən mülklərin necə idarə olunması və satış mexanizmləri ictimai maraq doğuran məsələlərdən birinə çevrilib.
Müsadirə edilən villalar, mənzillər, bahalı avtomobillər və digər mülklər sonradan kimə verilir və necə istifadə olunur?
Dövlətin mülkiyyətinə keçən əmlaklar hərraca çıxarılırmı? Adi vətəndaşlar həmin əmlakları ala bilərlərmi?
Həbs olunan şəxsin həyat yoldaşının və övladlarının onun əmlakında payı varsa, bu hüquqlar necə qorunur?
Mövzu ilə bağlı Crossmedia.az-a açıqlama verən Hüquqşunas Əkrəm Həsənov bildirib ki, bu məsələ doğrudan da ən müəmmalı məsələlərdən biridir:
"Qanuna görə əlbəttə ki, müsadirə olunan əmlak ya dövlət tərəfindən idarə olunmalıdır, gəlir gətirməlidir dövlətə, amma bir qayda olaraq hərraca çıxarılmalıdır, satılmalıdır. Dövlətə həmin əmlak lazımdır ki, pul əldə etsin. Amma heç vaxt görmədim ki, dövlət adamları iclasda bax bu qədər də gəlirimiz müsadirədəndir desin. Heç vaxt görmədim onu. Bu həqiqətən də müəmmalı məsələlərdən biridir və heç vaxt bu barədə dəqiq məlumat verilmir. Əslində müsadirə necə edilib, hansı məbləğdə edilib və müsadirə edilən əmlak necə istifadə olunacaqsa ictimaiyyətə məlum olmalıdır".
Nuray Oqtayqızı
17:00 30.10.2026
Oxunuş sayı: 58
