Trampın Rusiya ilə bağlı planı: "Gələcək günlərdə hakimiyyət daxilindəki qüvvələr..."
NATO-nun Avropadakı Birləşmiş Silahlı Qüvvələrinin baş komandanı amerikalı general Kristofer Kavoli bildirib ki, daha bir neçə F-16 qırıcısı Ukraynaya təhvil verilməyə hazırlanır.
Onun sözlərinə görə, Ukraynada artıq bir neçə F-16 və təlim keçmiş pilot var. Hazırda göndərilməyə hazırlanan daha çox F-16 və təlim prosesində olan pilotlar mövcuddur. General ABŞ Senatının Silahlı Qüvvələr Komitəsinin dinləmələrində qeyd edib ki, təyyarələr sıradadır və hər gün uçurlar. O əlavə edib ki, bu F-16-lar ABŞ-dən deyil, əsasən Şimali Avropa ölkələrindən Ukraynaya göndərilib. Kavoli həmçinin bildirib ki, Ukrayna hərbçiləri “Patriot” zenit-raket komplekslərindən istifadə etməyə davam edirlər.
Rusiya - Ukrayna müharibəsində danışıqların gündəmə gəldiyi bir vaxtda yeni qırıcıların tədarükü məsələsi sual yaradır: Bu təşəbbüs nəyə hesablanıb- savaşın daha genişlənməsinə, yoxsa Ukraynanın müdafiəsinə?
Bu barədə Crossmedia.az-a açıqlamasında politoloq Əhəd Məmmədli bildirib ki, ABŞ bununla Rusiyaya xəbərdarlıq edir və hədə-qorxu gəlir ki, mənim şərtlərimlə atəşkəs qəbul ediləcək, əks halda Ukraynanı silahlandırmağa davam edəcəyəm: “Beləliklə, Ukrayna müqavimət göstərəcək. Əslində Kiyev itirə-itirə gedir, ancaq ən azından müqavimət göstərəcək. Hər bir müqavimət də nə vaxtsa qalibiyyətin carçısı ola bilər. Müharibənin uzanması isə Rusiya üçün əlavə itkidir. İndilik Rusiya silah-sursat və canlı itkilərini kompensasiya edə bilir, ancaq bu bir yerə qədərdir. Ondan sonra artıq cəmiyyət də, hakim elita da səsini çıxaracaq. Bunların hamısı Rusiya Prezidenti Vladimir Putinin iqtidarı üçün təhlükəlidir. Gələcək günlərdə əgər saldafon yox, hakimiyyət daxilindəki ciddi qüvvələr Putinə etiraz etməyə başlasa, bu artıq əvvəlcə Putin rejimi üçün, sonra isə Rusiya dövləti üçün təhlükəli ola bilər”.
Politoloq, həmçinin bildirib ki, ABŞ “qamçı və çörək” siyasətini yeridir: "Düşünürəm ki, bu siyasətlə o, Putini atəşkəsə razı salmaq istəyir. Çünki indi elə bir vəziyyətdir ki, Trampın Rusiya-Ukraynanı atəşkəsə razı salmağı, istər daxili, istərsə də xarici imici üçün vacibdir. Vaşinqton düşünür ki, artıq hər iki tərəfdən də pul qazanmaq və dövlətini varlandırmağa davam etmək lazımdır”.
Fidan Xəlilova
17:07 04.04.2025
Oxunuş sayı: 10508
