Xarici xəbərlər

Ermənistan hökuməti hərbi xidmətdən yayınmaya görə cəzaları sərtləşdirir

Ermənistan hökuməti hərbi xidmətdən yayınmaya görə cəzaları sərtləşdirən qanun layihəsini təsdiqlədi.

Crossmedia.az erməni mediasına istinadən xəbər verir ki,Ermənistan hökuməti 3 aprel tarixində keçirilən iclasında məcburi hərbi və ya alternativ xidmətdən, eləcə də hərbi toplanışlara çağırışdan yayınmaya görə cinayət cəzalarının sərtləşdirilməsini nəzərdə tutan qanun layihəsini təsdiqləyib.

Qanun layihəsinə əsasən, Ermənistan Cinayət Məcəlləsinin 461 və 462-ci maddələrinə dəyişikliklər edilməsi təklif olunur. Yeni qaydalara görə, məcburi hərbi və ya alternativ xidmətdən yayınmaya görə azadlıqdan məhrumetmə müddəti hazırkı 2-5 ildən 3-6 ilə qaldırılacaq. Hərbi toplanışlardan yayınan şəxslər isə bundan sonra 1 ildən 3 ilə qədər azadlıqdan məhrum edilə bilər, həmçinin cərimələrin məbləği əhəmiyyətli dərəcədə artırılacaq.

Hökumət cəzaların sərtləşdirilməsini hərbi xidmətdən yayınma hallarının artması ilə izah edir. Rəsmi məlumata görə, 2023-cü ildə 1499 cinayət işi açılıb, 2024-cü ildə isə bu göstərici 1779-a yüksəlib.

"Bu, cinayət siyasətinin yenidən nəzərdən keçirilməsinin və bu cür hərəkətləri törədən şəxslərə qarşı daha sərt cəza tədbirlərinin tətbiq edilməsinin vacibliyini göstərir" – qanun layihəsinin əsaslandırılmasında qeyd olunur.

Zəhra Məmmədova

🖨 Çap et

13:26 03.04.2025

Oxunuş sayı: 741